Bir zamanlar şahzadəni təmsil edən vəkil idi - indi zibil qutularından EŞƏLƏNİR - FOTOlar

Bir zamanlar Almaniyanın ən nüfuzlu media hüquqşünaslarından biri olan Klaus Rebok indi Yunanıstanın kiçik Platariya qəsəbəsində çimərlikdə yaşayır.

Milli.Az bu barədə BILD-ə istinadla xəbər verir.

Bildirilir ki, bu yaxınlarda 63 yaşını qeyd edən tanınmış vəkilin həyatı dramatik şəkildə dəyişib.

Rebok karyerası zirvədə olarkən Almaniyada tanınmış "Burda" nəşriyyat evi ilə sıx əməkdaşlıq edib. Onun müştəri siyahısında Bundestaqın Xristian-Sosial İttifaq (XSS) partiyasından olan sabiq deputatı Qabriele Paulini, məşhur televiziya aparıcısı Florian Zilberayzen olub və hətta Monako şahzadəsi Karolina kimi yüksək profilli şəxsləri məhkəmədə təmsil edib. Hüquq sahəsində 30 ildən çox təcrübəsi olan Rebok mətbuat və şəxsi həyat toxunulmazlığı məsələlərində Almaniyanın ən hörmətli ekspertlərindən biri sayılıb.

Lakin 2017-ci ildə başlayan şəxsi faciələr silsiləsi onun həyatını alt-üst edib. Əvvəlcə nikahı pozulub, ardınca qızı ilə bağlı ağır qəyyumluq mübahisələri başlayıb. Bu çətin dövrdə ən yaxın dayağı olan xalasını da itirib. Rebok bu itkiləri "həyatımın dönüş nöqtəsi" adlandırır.

"Bütün bu hadisələr məni dərindən sarsıtdı. Bir gün anladım ki, artıq əvvəlki həyatımı davam etdirə bilmərəm", - deyə Rebok bir yerli jurnalistə açıqlamasında bildirib.

Bundan sonra o, radikal bir qərar verərək Almaniyanı tərk edib. Əvvəlcə İtaliyaya köçüb, sonra isə Yunanıstanın sakit Platariya qəsəbəsində məskunlaşıb. Burada ofisi də olan bir ev kirayələyib, lakin maliyyə vəziyyətinin pisləşməsi səbəbindən altı ay ərzində kirayə haqqını ödəyə bilməyib və nəticədə evdən çıxarılıb.

"Bütün əmlakımı itirdim. Yalnız bir neçə dəst paltarım qalıb", - deyə keçmiş vəkil hazırkı vəziyyətini təsvir edir.

Hazırda Rebok Yunanıstanın Platariya çimərliyində açıq havada yaşayır. Onun evi bir çimərlik yatağı, yoldaşları isə iki pişik və bir itdir. Keçmiş elit vəkil gündəlik yeməyini tapmaq üçün zibil qutularını axtarır və yerli sakinlərin köməyi ilə dolanır.

Maraqlısı odur ki, Rebok Almaniyaya qayıtmaq təkliflərini qətiyyətlə rədd edir. Keçmiş müştəriləri, məktəb dostları və hətta doğulduğu Bodenmays şəhərinin meri Mixael Adam ona mənzil və sosial ödənişlərin rəsmiləşdirilməsində kömək təklif etsələr də, o bu yardım cəhdlərini qəbul etmir. /Oxu.Az

Milli.Az