10 nəfəri güllələyən məktəbli qətliamdan əvvəl anasına video göndəribmiş - FOTO

Qratsda 10 nəfəri qətlə yetirən şagird atəş açmazdan əvvəl anasına vida videosu göndəribmiş.

Milli.Az dailymail-ə istinadla xəbər verir ki, əvvəllər məktəbdə bullinqə məruz qaldığı deyilən yeniyetmə çərşənbə axşamı Avstriyanın Qrats şəhərində yerləşən "BORG Dreierschützengasse" məktəbində 10 şagirdi güllələyərək qətlə yetirib. O, atəş açmazdan bir neçə dəqiqə əvvəl anasına vida videosu göndərib.

21 yaşlı silahlı şəxs hadisədən sonra həyatını sonlandırıb. İstintaqçılar onun evində apardıqları axtarış zamanı videomesaj aşkarlayıblar.

Polis araşdırmanın detalları barədə sosial şəbəkə X-də yalnız qısa məlumat paylaşıb, əlavə şərh verməyib.

Avstriya Daxili İşlər Nazirliyinin ictimai təhlükəsizlik üzrə direktoru Frans Ruf ORF dövlət televiziyasına açıqlamasında bildirib ki, şübhəlinin yazdığı vida məktubu da tapılıb:

"Valideynlərinə vida edir. Amma məktubdan motiv çıxarmaq mümkün deyil, bu, hələ araşdırılmalıdır," - deyə Ruf qeyd edib.

Avstriyanın "Heute" xəbər saytının yazdığına görə videonun məzmunundan narahat olan ana dərhal polisə məlumat verib.

Lakin onun faciəni dayandırmaq cəhdi gecikib - video mesajı aldıqdan 24 dəqiqə sonra açıb və həmin vaxt oğlu artıq iki sinif otağına hücum etmişdi.

Hücumun qurbanlarının təsadüfi seçilib-seçilmədiyi hələlik məlum deyil. Ruf bildirib ki, bu məsələ də araşdırılır və indidən hər hansı ehtimal irəli sürmək istəmir.

Onun sözlərinə görə, yaralılar məktəbin müxtəlif mərtəbələrində və bir nəfər də binanın qarşısında tapılıb. Qurbanlardan biri15 yaşlı kosovalı qız Lea olub. Onun fotosu ilk dəfə yayılıb.

Leanın bibisi "Facebook"da paylaşım edərək yazıb: "Bu gün bacım qızı Lea Qratsdakı hücum zamanı faciəli şəkildə həyatını itirdi. Onun üçün rəhmət diləyirik və bu ağır günlərdə acımızı paylaşan hər kəsə təşəkkür edirik."

Qeyd edək ki, "Artur A." kimi tanınan gənc əvvəllər oxuduğu sinifə daxil olaraq qanuni yolla sahib olduğu ov tüfəngi və tapança ilə atəş açmağa başlayıb. Hadisə zamanı ondan çox insan yaralanıb.

Avstriyada indiyədək baş vermiş ən ağır məktəb qətliamında şagirdlər dəhlizlərdə və sinif otaqlarında qorxudan gizlənərək özlərini ölü kimi göstəriblər və ya qaçaraq canlarını qurtarmağa çalışıblar. Hadisə zamanı çəkilən dəhşətli videoda əvvəlcə güllə səsləri, sonra isə qışqırıqlar eşidilir. Qətlə yetirilənlər arasında müəllimlərin də olduğu deyilir.

Bəxtiyar Umarlı
Milli.Az