Qadın, əri və 5 sevgilisi həbs edildi - Hotel otağında vəhşiliyə görə - FOTO

ABŞ-nin Ohayo ştatında bir qadın, onun əri və dörd sevgilisi 26 yaşlı gənci bir həftə boyunca otel otağında əsir saxlayaraq işgəncə verməkdə ittiham olunur.

Milli.Az nypost-a istinadla xəbər verir ki, Polisin məlumatına görə 28 yaşlı Martina Cons əri Maykl Eskeda və sevgililəri - 49 yaşlı Aaron Bredşou, 28 yaşlı Ostin Bredşou, 26 yaşlı Devid Sesna və 27 yaşlı Çens Conston martın 22-də Maume şəhərində "Red Roof Inn" otelində gəncə qarşı zorakılıq etdiklərinə görə saxlanılıb.

İstintaq materiallarına əsasən cinayətkarlar qurbanı metal beysbol dəyənəyi ilə vəhşicəsinə döyüb, uzun müddət ayaq üstə dayanmağa məcbur edib və gün ərzində yalnız bir dəfə yemək və içmək icazəsi veriblər. Polis bildirib ki, kişi saxlanıldığı müddətdə cəmi 10 saat yata bilib və davamlı olaraq yumruq, təpik və dirsək zərbələrinə məruz qalıb.

Maume polis rəisi Coş Sprow açıqlamasında bildirib ki, qurban döyülərək bir neçə sümüyü sındırılıb. Onun sözlərinə görə Cons martın 14-də qisas məqsədilə bu dəhşətli planı həyata keçirməyi sevgililərinə əmr edib. Hadisə Consun evindəki itlərin dalaşması zamanı başlayıb və o, bu münaqişəni ayırmağa çalışarkən qolunu sındırıb. Lakin polis bildirib ki, qadın yalan danışaraq həmin şəxsin qəsdən onu şikəst etdiyini iddia edib və sevgililərini ona hücum etməyə təhrik edib.

Nəhayət, martın 21-də qurban Speedway marketinə getməyə icazə aldıqda bir nəfərlə danışaraq anasına xəbər verməyi xahiş edib. Polis rəisinin sözlərinə görə, anası dərhal hadisə yerinə gələrək oğlunu xilas edib. Onun bədənində çoxsaylı xəsarətlər aşkar olunub.

İstintaq çərçivəsində altı şübhəli şəxs adam oğurluğu, ağır hücum və sübutları dəyişdirmə ilə bağlı ittiham olunub. Məhkəmə onların hər birinin 200 min dollar qarşılığında azadlığa buraxılmasına qərar verib.

İsmayıl
Milli.Az