Türkiyə

"Ərdoğana qarşı bir neçə sui-qəsd planı hazırlanmışdı"

21 İyul 2026 14:38

Baxış: 769

VTB-də minimal faiz dərəcəsi ilə nağd kredit 9.9%-dən

#HADİSƏ #TÜRKİYƏ #RƏCƏB TAYYİB ƏRDOĞAN

Türkiyədə 2016-cı il çevriliş cəhdindən əvvəl və həmin gecə Prezident Rəcəb Tayyib Ərdoğana qarşı bir neçə sui-qəsd planının hazırlandığı iddia olunub.

Milli.Az xəbər verir ki, bu barədə təqaüddə olan briqada generalı İbrahim Böyükbaş danışıb. Onun sözlərinə görə, ilk planlardan biri hərbi təlim zamanı həyata keçirilməli idi. Lakin kəşfiyyat orqanlarının şübhəli halları müəyyən etməsindən sonra prezidentin tədbirdə iştirakı ləğv edilib.

General bildirib ki, daha sonra təhlükəsizlik qurumları Ərdoğana qarşı yeni sui-qəsd planı barədə məlumat əldə ediblər. Onun sözlərinə görə, bu plan 1981-ci ildə Misir Prezidenti Ənvər Sədatın hərbi parad zamanı qətlə yetirilməsi ssenarisi əsasında hazırlanmışdı.

İbrahim Böyükbaş qeyd edib ki, sonuncu cəhd isə 15 iyul 2016-cı il çevrilişi gecəsi baş verib. Ərdoğanın Marmarisdə yerləşən oteldən vaxtında ayrılması nəticəsində plan baş tutmayıb.

Xatırladaq ki, 15 iyul 2016-cı ildə Türkiyədə baş vermiş çevriliş cəhdi zamanı 253 nəfər həlak olub, 2200-dən çox insan yaralanıb. Hadisələrdən sonra minlərlə şəxs saxlanılıb, yüzlərlə çevriliş iştirakçısı ömürlük həbs cəzasına məhkum edilib.

Müəllif: Nərmin Mahmudova (Milli.Az müxbir)