İdman

İngiltərə klubu Endrik uğrunda “Roma”ya rəqib oldu

10 Avqust 2026 13:10

Baxış: 223

VTB-də minimal faiz dərəcəsi ilə nağd kredit 9.9%-dən

#FUTBOL

İspaniyanın "Real" futbol komandasının hücumçusu Endrikin gələcəyi ilə bağlı yeni variant ortaya çıxıb.

Milli.Az İdman.Biz-ə istinadən bildirir ki, 19 yaşlı braziliyalı futbolçunun icarəsi üçün "Roma" ilə yanaşı, İngiltərənin "Aston Villa" komandası da mübarizəyə qoşulub. Hər iki klub Endrikin daha çox oyun praktikası qazanmaq istəyi və Avropa kuboklarında çıxış etmək tələblərinə uyğun variant hesab olunur.

"Roma" bir müddətdir Endrikin transferi üzərində işləyir və futbolçu üçün əlverişli variantlardan biri sayılır. Bununla belə, "Aston Villa"nın marağı İtaliya klubunun işini çətinləşdirə bilər. "Real" da gənc hücumçunun inkişafını davam etdirməsi üçün növbəti icarəyə müsbət yanaşır.

Endrikin Madrid klubundakı mövqeyi də onun mümkün gedişini sürətləndirir. Joze Mourinyo futbolçuya əsas heyətdə rolunun məhdud olacağını bildirib. Hücum xəttində Kilian Mbappe və Karlos Espi kimi futbolçuların mövcudluğu braziliyalının daimi oyun vaxtı almasını çətinləşdirir.

"Real" Endriki 2024-cü ildə "Palmeyras"dan ilkin olaraq 35 milyon avroya (təxminən 68,6 milyon AZN) transfer edib. Müqavilədə əlavə 25 milyon avroya (təxminən 49 milyon AZN) qədər bonuslar da nəzərdə tutulub.

Mənbənin məlumatına görə, Endrikin illik maaşı beş milyon avrodan (təxminən 9,8 milyon AZN) çoxdur. İcarə baş tutacağı halda, "Real" bu məbləğin bir hissəsini ödəməyə hazır ola bilər ki, bu da "Roma" və ya "Aston Villa" üçün maliyyə yükünü azaldar.

Qeyd edək ki, Endrik ötən mövsümün ikinci yarısını icarə əsasında "Lion"da keçirib. O, Fransa klubunda 21 oyunda səkkiz qol vurub və yeddi məhsuldar ötürmə edib. Uğurlu çıxışı braziliyalının yenidən "Real"a qayıtmasına imkan versə də, hazırkı rəqabət onun növbəti dəfə icarəyə göndərilməsi ehtimalını artırıb.

Müəllif: Tural Hüseyn (Milli.Az redaktor)