İdman

FİFA Trampın xahişi qəbul etdi: Qırmızı kart görsə də oynayacaq

6 İyul 2026 11:08

Baxış: 1 249

VTB-də minimal faiz dərəcəsi ilə nağd kredit 9.9%-dən

#BELGİUM #FUTBOL #ABŞ #FİFA #DONALD TRAMP

Beynəlxalq Futbol Assosiasiyaları Federasiyasının (FIFA) İntizam Komitəsi ABŞ millisinin hücumçusu Folarin Balogunla bağlı diqqətçəkən qərar qəbul edib.

Milli.Az xarici mətbuata istinadən xəbər verir ki, qurum futbolçunun diskvalifikasiyasını ləğv edərək onun Belçikaya qarşı Dünya Kubokunun 1/8 final oyununda iştirakına icazə verib.

Məlumata görə, Folarin Balogun Bosniya və Herseqovina ilə 1/32 final qarşılaşmasında rəqib futbolçu Tarik Muharemoviçə qarşı kobud hərəkət etdiyi üçün birbaşa qırmızı vərəqə almışdı. Mövcud qaydalara əsasən, belə halda futbolçu növbəti matçı avtomatik buraxmalıdır.

Bununla belə, FIFA İntizam Məcəlləsinin 27-ci maddəsinə əsaslanaraq cəzanın icrasını bir illik sınaq müddəti ilə əvəz edib. Qərara əsasən, Folarin Balogun sınaq müddətində oxşar qayda pozuntusuna yol verərsə, diskvalifikasiya qüvvəyə minəcək.

Bu qərar Dünya Kuboku tarixində ilk belə presedent kimi qiymətləndirilir.

Qərar Kral Belçika Futbol Assosiasiyası (RBFA) tərəfindən narazılıqla qarşılanıb. Təşkilat yaydığı açıqlamada FIFA-nın öz qaydalarına zidd addım atdığını bildirərək bütün mümkün apelyasiya variantlarını nəzərdən keçirdiyini açıqlayıb.

Mediada yayılan məlumatlara görə, Reuters agentliyi amerikalı futbolçunun cəzasının dayandırılması üçün FIFA prezidenti Canni İnfantinoya ABŞ Prezidenti Donald Trampın şəxsən müraciət etdiyini iddia edib. Bildirilir ki, Donald Tramp bununla bağlı Canni İnfantino ilə telefon danışığı aparıb.

ABŞ lideri daha sonra Folarin Balogunun Belçika ilə oyunda iştirakına şərait yaradıldığı üçün FIFA-ya təşəkkürünü də ifadə edib.

Qeyd edək ki, ABŞ və Belçika milliləri arasında Dünya Kubokunun 1/8 final qarşılaşması iyulun 7-də keçiriləcək.

Müəllif: Tural Hüseyn (Milli.Az redaktor)