Cəmiyyət

Atəşkəsə az qalmış şəhidlik zirvəsinə ucalmış Orxan Rəhimli - 3 medalla təltif edilib - VİDEO

17 Mart 2021 13:29

Baxış: 1 407

#VİDEO #ŞƏHİD #DAĞLIQ QARABAĞ MÜNAQİŞƏSİ

Vətən müharibəsində şücaət göstərən hərbçilərimizdən biri də Orxan Rəhimli olub.

Milli.Az xezerxeber.az-a istinadən bildirir ki, atası birinci qrup əlil olduğundan Orxan Rəhimlini döyüşə aparmayıblar. O isə könüllü olaraq torpaqlarımızın azadlığı uğrunda mübarizəyə qatılıb.

Oğuz rayonunun Xaçmaz kənd sakini, 27 yaşlı Orxan Rəhimli Vətən müharibəsi başlayana qədər Daşkəsəndə işləyib. Döyüşlərin başladığını da elə işdə olarkən eşidib. İş yoldaşlarına deyib ki, bu müharibədə mütləq iştirak edəcək və Azərbaycan bayrağını Şuşada dalğalandıracaq. Elə bu məqsədi uğrunda da cəbhəyə könüllü yazılıb...

Füzulidən başlayan döyüş yolunu qəhrəmanımız Şuşaya qədər davam etdirə bilib. Şuşa azad edildikdən sonra Şuşa-Xankəndi istiqamətində döyüşlərə davam edib. Bu vaxt ayağından yaralansa da, yarasını sarıyıb və döyüşməyə davam edib. Sonra sol çiynindən yaralanıb. Döyüş yoldaşlarının təkidinə baxmayaraq, yenə geri qayıtmayıb. 8 noyabrda döyüşlərin getdiyi son saatlarda aldığı üçüncü yaradan şəhidlik zirvəsinə ucalıb.

Orxan Rəhimli ölümündən sonra "Vətən Uğrunda", "Cəsur Döyüşçü" və "Şuşanın azad olunmasına görə" medalları ilə təltif olunub.

Milli.Az