Cəmiyyət

Qarabağda döyüşən hərbçilərimizin kredit borcları silinəcəkmi? - VİDEO - FOTO

20 Noyabr 2020 16:31
Baxış: 1 290

Azərbaycan Banklar Assosiasiyasına üzv banklar bir müddət öncə hərbçilərimizin və düşmən təxribatı nəticəsində zərər dəymiş vətəndaşlarımızın dəstəklənməsi məqsədilə qərar qəbul etdi.

Qərar cəmiyyətdə rəğbətlə qarşılandı, onun icrası böyük maraqla izlənməyə başlandı. Son günlər bəzi sosial şəbəkə istifadəçilərinin qərarın icrası ilə bağlı problemlərin yarandığını bildirməsi isə narahatlığa səbəb olub.

Milli.Az bildirir ki, "ARB Xəbər" sözügedən məsələ ilə bağlı maraqlı süjet hazırlayıb.

İddia olunur ki, bəzi banklar borcu olan və səfərbərliyə cəlb edilən vətəndaşlardan bəzilərinin, xüsusən də yaralı hərbçilərin qərarda göstərildiyi kimi kredit faizlərini dondurmayıb.

Rəşad Həsənov - İqtisadçı: "Onların əmək fəaliyyəti artıq risk altına düşüb. Əsas onların borclarının silinməsi, dondurulması, eyni zamanda növbəti dövrlərdə gəlirlərindən, əmək qabiliyyətini bərpa etmək imkanından asılı olaraq yaralıların belə kredit öhdəliklərinin silinməsindən söhbət getməlidir".

Məsələ ilə bağlı bankların da mövqeyini öyrəndiq.

 Pərviz Sədrəddinov - "Kapital Bank"ın şöbə rəisi: "Torpaqlarımızın azad edilməsi uğrunda döyüşlərdə şəhid olmuş hərbçilərimizin, habelə düşmən təxribatı nəticəsində həyatını itirmiş mülki vətəndaşlarımızın kredit borclarını tam olaraq silinir".

Orxan Kazımov - "Bank of Baku"nun departament direktoru: "Bütün hərbçilərimizin, eyni zamanda hərbi səfərbərliyə cəlb edilmiş müştərilərimizin kreditlərinin təqibi tam dayandırılmışdır".

Bank VTB-dən isə bildirildi ki, problemlə əlaqədar mümkün variantlar müştərilərə təklif edilib. Ümumilikdə banklardan aldığımız yekun fikir isə belə oldu: borcların dondurulması, yaxud silinməsi qısa müddətdə reallaşan proses deyil.

Rəşad Həsənov - İqtisadçı: "Biz bilmirik ki, nə qədər hərbçinin ümumi kreditindən söhbət gedir və onun strukturu nədir". 

Verdiyi qərara aydınlıq gətirməsi və cəmiyyətdə çaşqınlıq yaranmaması üçün Banklar Assosiasiyasına sorğumuz isə cavabsız qaldı. Mövcud reallıqları nəzərə alaraq, bu mövzunun diqqətdə saxlanılması vacibdir. Çünki söhbət vətən uğrunda hər şey fəda deyənlərdən gedir.

Milli.Az

Məqaləyə dair fotomateriallar:

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.