Trend BİA - 25 il: Kağız bülletenlərdən rəqəmsal platformaya

Bu gün, sentyabrın 1-də Trend müstəqil Beynəlxalq İnformasiya Agentliyi (BİA) 25 illik yubileyini qeyd edir. Trend BİA bu illər ərzində dövlət və xalq qarşısında öz məsuliyyətini başa düşən jurnalistləri sıralarında birləşdirir. Əsrin dörddə biri müddəti qədər fəaliyyətində Trend regional media məkanının lideri oldu. Kiçik özəl agentlik müştərilərinə kağız bülletenlərin çatdırılmasından dünyadakı analoqlarından geri qalmayan, bir çox dünya mediasının həsəd apara biləcəyi öz rəqəmsal platformasına sıçrayış edib.

Trend BİA-nın nailiyyətlərindən biri də İran, Gürcüstan və Orta Asiya ölkələrinin media məkanında rəqabət səviyyəsində işləməsidir. 2010-cu ildə "Moody's International" Trend-in beynəlxalq səviyyəli idarəçiliyi olan şirkət qismində statusunu təsdiq etdikdən sonra agentlik nüfuzlu məlumat bazalarına çıxış əldə etdi və bunun nəticəsi olaraq bu gün agentliyin yüzlərlə xəbəri transmilli mediada təkrar dərc olunur.

Trend BİA-nın uğurları sırasında keyfiyyətli məzmunu, etibarlı məlumat mənbəyi kimi nüfuzunu, agentliyin fəaliyyətinin rəqəmsallaşdırılmasını vurğulamaq lazımdır.

Bunun qanunauyğun nəticəsi Trend-in Avropa səviyyəsində tanınması olub: 25 illiyində Trend BİA Avropanın ən nüfuzlu media resursları reytinqində (Top 10 European News Websites To Follow in 2020) "EU Reporter" və "Euractiv" kimi Avropa nəhənglərini qabaqlayaraq üçüncü yerdə qərarlaşıb.

Trend qlobal informasiya məkanında inkişafa doğru beynəlxalq strategiyasını həyata keçirməyə davam edir. Trend-in törəmə fransızdilli layihəsi, Parisdə yerləşən lagazette.fr internet-qəzeti artıq Fransada fəaliyyətə başlayıb. Bundan əlavə, yaxın gələcəkdə oxşar layihələrin digər Avropa ölkələrində də inkişafı planlaşdırılır.

Hesab edirəm ki, bu, kiçik özəl xəbər agentliyi üçün böyük bir nailiyyətdir. Day.Az media şirkətinin kollektivi adından Trend BİA-dakı həmkarlarımı yubiley münasibətilə təbrik edirəm və peşəkar fəaliyyətlərində onlara daha böyük uğurlar diləyirəm!

Emin Əliyev

Day.Az-ın baş redaktoru