Sinif otaqlarını kim icarəyə verir? - AÇIQLAMA

Son günlər sosial şəbəkələrdə məktəb siniflərinin repetitorlara icarəyə verilməsi ilə bağlı yayılan məlumatlar geniş müzakirə olunur. Paylaşımlarda bu praktikanın qanunsuz olduğu vurğulansa da, ekspert rəyləri fərqlidir.

Milli.Az xəbər verir ki, təhsil eksperti Ramin Nurəliyev bildirir ki, bəzi direktorlar sinif otaqlarını müəllimlərə icarəyə verərək şagirdləri ödənişli hazırlığa yönləndirirlər. Onun sözlərinə görə, məktəblər şəxsi obyekt deyil və bu cür addımlar cəmiyyətdə ciddi narazılıq yaradır.

Mövzu ilə bağlı başqa təhsil eksperti Elnur Hacıyev isə hesab edir ki, məsələ hüquqi çərçivələrə uyğun şəkildə tənzimlənərsə, müəyyən xidmətlərin göstərilməsi mümkündür. O, vurğulayır ki, dövlət məktəbləri hüquqi şəxs kimi balans hesabına malikdir və nizamnaməyə uyğun fəaliyyət göstərə bilər.

Hüquqşünas Hikmət Əliyev isə bu fikirlərlə razılaşmır və bildirir ki, sinif otaqlarının kommersiya məqsədilə istifadəsi qanunla qadağandır. Onun sözlərinə görə, bu qaydanı pozan direktorlar 3 500-5 000 manatadək cərimə oluna bilər. Əgər repetitorluqdan gəlir əldə olunubsa, əlavə olaraq qanunsuz sahibkarlıq və vergidən yayınma ilə bağlı məsuliyyət də yarana bilər.

Asya Hüseyn
Milli.Az