Sahilini Xəzərin ləpələri döyən viran olmuş park - Dağılmış skamyalar, paslanmış yelləncəklər, aşmış ağaclar... - VİDEO - FOTO

Baxımsızlıqdan əziyyət çəkən "Sahil incisi"...

Söhbət Qaradağ rayonu Sahil qəsəbəsində, dəniz kənarındakı parkdan gedir. Qəsəbə sakinlərindən Milli.Az-a daxil olan məktubda bildirilir ki, onlar parkın bu halından narazıdır.

"20 ilə yaxın olar ki, bu park tikilib. Həm ərazisinin geniş olması, həm də dəniz kənarında yerləşməsinə görə həmişə istirahət üçün bura gəlmişik, uşaqlarımızı, nəvələrimizi gətirmişik. İndi isə parkda əyləşməyə salamat yer belə yoxdur. Əvvəllər burada uşaqların əyləncəsi üçün şərait də vardı".

Qeyd edək ki, parkda olduğumuz müddətdə əraziyə nəzarət edən, qoruyan bir işçiyə rast gəlmədik. Əvəzində isə uçub dağılan səkiləri, xaraba qalan fontanı, yarı qırılmış haldakı daşdan oturacaqlarla rastlaşdıq.

Mavi Xəzərin bir addımlığındakı parkda təbii ağacların çox olması sevindirici haldır. Amma qayğısızlıq zaman-zaman bu yaşıllığın da axırına çıxır. Parkda quruyub qalan ağaclar, ağac ətrafındakı tullantılar, səliqəsizlik baş alıb gedir.

Digər tərəfdən sakinlərin təkcə gündüzlər deyil, axşam saatlarında da istirahət üçün bura gəldiklərini nəzərə alsaq, parkda heç bir işıqlandırmanın olmaması daha bir problemi ortaya çıxarır. Sözün əsl mənasında, parkda əhalinin istirahəti "qara gün"ə qalıb desək, yanılmarıq.

Vaxtilə uşaqlar üçün quraşdırılan, indi bu sınıq-sökük olan əyləncə yerləri isə, sanki, müharibədən sonra tərk edilmiş yeri, xarabalığı xatırladır...

Dünyanın bir çox ölkələrində dəniz kənarında belə qəsəbələr var. Lakin onların gözəlliklərinə, yaradılan şəraitə baxdıqca insan zövq alır. Digər tərəfdən ölkəmizin əksər ərazilərində yenidənqurma və abadlıq işlərinin getdiyi, yeni parkların salındığı bir vaxtda istirahət üçün əlverişli məkanda yerləşən bu parkın acınacaqlı vəziyyəti çox təəssüfləndirici haldır.

Afaq Rza
Milli.Az 

Videoları izləmək üçün şəkillərə klikləyin: