Mübariz Qurbanlı: "Dini maarifləndirmə işinə daha diqqətlə yanaşılmalıdır" - FOTO

"Hər kəsin dini etiqad azadlığı var. Bununla yanaşı, milli-mənəvi dəyərlərimizin tərkib hissəsi olan, o cümlədən ölkə əhalisinin əksəriyyətinin etiqad etdiyi İslam dini və mədəniyyətinin təbliği prioritet məsələlərdəndir. Ancaq unutmaq lazım deyil ki, hazırda dünyada İslam dinini radikalizmə sürükləmə meyilləri artır. Odur ki, dini maarifləndirmə işinə daha diqqətlə yanaşılmalıdır".

Dini Qurumlarla İş üzrə Dövlət Komitəsinin (DQİDK) mətbuat xidmətindən Trend-ə verilən məlumata görə, bunu sentyabrın 16-da Qubada Dövlət Komitəsinin təşkilatçılığı ilə respublikanın şimal bölgəsində fəaliyyət göstərən dini icma sədrləri, imam və axundlar, eləcə də fəal dindar və ilahiyyatçılar üçün "Milli adət-ənənələrimiz və müasirlik" mövzusunda iki günlük regional konfransın açılışında DQİDK-nın sədri Mübariz Qurbanlı deyib.

Dövlət-din münasibətlərinin daha yüksək səviyyədə tənzimlənməsi, dini maarifləndirmə işinin təşkili və aparılması, həmçinin dini icmaların cəmiyyətdə radikalizm meyillərinin qarşısının alınması və sosial problemlərin həlli prosesinə cəlb olunması məqsədilə keçirilən regional konfransın açılış mərasimində çıxış edən M.Qurbanlının sözlərinə görə, ölkə dindarlarını xarici təsirlərdən qorumaq daha çox ruhanilərin üzərinə düşən məsuliyyətdir: "Əsrlərin süzgəcindən keçərək müasir dövrümüzədək qoruyub saxladığımız milli-mənəvi, dini adət-ənənələrimizi yaşatmalı və onu düzgün şəkildə insanlara çatdırmalıyıq".

Dövlət Komitəsinin sədri, həmçinin konfransın əhəmiyyətindən və ölkəmizdəki dövlət-din münasibətlərindən ətraflı danışaraq bildirib ki, Azərbaycan müstəqilliyini bərpa etdikdən sonra xalqımızın milli-mənəvi dəyərlərinə qayıdışı sürətlənib. O, bu istiqamətdə ümummilli lider Heydər Əliyevin müstəsna xidmətlərini qeyd edib və hazırda Prezident İlham Əliyevin milli-mənəvi dəyərlərimizin, dinimizin inkişafı istiqamətində həyata keçirdiyi işlərdən danışıb.

Ümummilli lider Heydər Əliyevin "Biz dünyəvi dövlətik, amma dindən də ayrı deyilik" fikrini vurğulayan M.Qurbanlı qeyd edib ki, bu gün ölkəmizdə dinlərarası münasibətlər ən yüksək səviyyədədir.

Tədbirdə Quba rayon İcra Hakimiyyətinin başçısı Mübariz Ağayev, Azərbaycan Respublikasının millətlərarası, multikulturalizm və dini məsələlər üzrə Dövlət müşaviri xidmətinin baş məsləhətçisi Müzəffər Talıblı, millət vəkililəri Vahid Əhmədov, İlham Əliyev, Yevda Abramov, Qafqaz Müsəlmanlar İdarəsi sədrinin müavini Qəmərxanım Cavadlı, ölkə ictimaiyyətinin, eləcə də elmi dairələrin nümayəndələri iştirak ediblər. Konfransda çıxış edən din xadimləri ölkədə dini maarifləndirmə işinin gücləndirilməsinin zəruriliyini bildirib, son dövrlər Dini Qurumlarla İş üzrə Dövlət Komitəsinin təşəbbüsü ilə bu istiqamətdə həyata keçirilən tədbirləri yüksək qiymətləndiriblər.

Açılış mərasimindən sonra panellər üzrə davam edən konfransda maraqlı məruzələr dinlənilib. "Milli kimliyimizin formalaşmasında milli-mənəvi dəyərlərimizin yeri və rolu" adlı plenar iclasda Azərbaycan Respublikası Prezidenti yanında Dövlət İdarəçilik Akademiyasının doktorantura şöbəsinin müdiri, tarix elmləri doktoru, professor Musa Quluzadə "Müasir Azərbaycanda milli-mənəvi dəyərlərin qorunması (Ümummilli lider Heydər Əliyevin və Prezident İlham Əliyevin fəaliyyətləri kontekstində)", Bakı Dövlət Universiteti İlahiyyat fakültəsinin müəllimi, fəlsəfə doktoru Aqil Şirinov "Milli kimliyimiz və İslam dini", Bakı Dövlət Universiteti Tarix fakültəsinin müəllimi, ilahiyyatçı, fəlsəfə doktoru Saleh Kazımov "Azərbaycan ruhaniliyi və milli dövlətçiliyimizin qurulması prosesi" mövzularında məruzələrlə çıxış ediblər.

Konfransda "Azərbaycanın Şimal bölgəsində ənənəvi İslam", "Ənənəvi İslam: dini radikalizmə qarşı mənəvi müdafiə sistemi", "İrfan məktəbi - ənənəvi İslamın bərpası" mövzuları ətrafında fikir mübadiləsi aparılıb.

Konfransda, həmçinin Dövlət Komitəsinin Dini qurumlarla iş üzrə şöbəsinin müdiri Niyaz Yaqubov "Milli-mənəvi dəyərlərimizin təbliğ olunmasında dini icmaların yeri və rolu", Dini Araşdırmalar Mərkəzinin icraçı direktoru Natiq Rəhimovun "Din xadimlərinin natiqlik qabiliyyəti və motivasiya üsulları", Dini Qurumlarla İş üzrə Dövlət Komitəsinin Dinşünaslıq ekspertizası, ictimai məsələlər və analitik təhlil şöbəsinin müdiri Nahid Məmmədovun "Vətənpərvərlik milli-mənəvi dəyər kimi", Dövlət Komitəsinin Dinşünaslıq ekspertizası, ictimai məsələlər və analitik təhlil şöbəsinin müdir müavini Əliheydər Zülfüqarovun "Dini icmaların fəaliyyəti: imkanlar və perspektivlər" və Qafqaz Müsəlmanları İdarəsinin Quba rayonu üzrə səlahiyyətli nümayəndəsi, Quba şəhəri "Hacı Cəfər" məscidinin imamı Elnur Əfəndiyevin "İslamda vətən və dövlət sevgisi" mövzularındakı məruzələri konfrans iştirakçıları tərəfindən yüksək dəyərləndirilib.

Milli.Az

Böyütmək üçün şəkillərə klikləyin.