"Qızımı bir qaibə görə kəsiblər, diplom ala bilməyəcək, psixoloji durumu ağırlaşıb" - Direktor iddialara cavab verdi

Azərbaycan Memarlıq və İnşaat Universiteti nəzdində İnşaat Kollecinin tələbəsinin anası övladının haqsız yerə kəsildiyini iddia edir.

Bu barədə Milli.Az-a şikayət daxil olub.

Valideynin sözlərinə görə, qızı Esmira Dəmirova Memarlıq və İnşaat Universiteti nəzdində İnşaat Kollecində 3 ildir ödənişli əsaslarla təhsil alır və yüksək akademik göstəricilərə malikdir. O bildirib ki, qaib limiti 15-dir. Övladının isə 16 qaibi var. Buna görə də imtahanlara buraxılmaması və diplom ala bilməməsi nəzərdə tutulur:

"Uşağım əlaçıdır. Bir qaibə görə həm diplomdan, həm də universitetə qəbul imtahanı vermək imkanından məhrum olur. Xəstə olub, panik atak problemi var. Direktorun yanına gedib xahiş etdim, amma kömək edilmədi. Başqa tələbə yoldaşlarından da gəlməyənlər olub, amma onlar kəsilməyib. Sırf mənim uşağımı bilir ki, yaxşı oxuyur, əlaçıdır, universitetə qəbul olacaq, buna görə qəsdən kəsir. Deyir ki, 500 manat ödə, gələn il də oxusun. Mənim uşağım əlaçı ola-ola niyə mən bir də 500 manat ödəməliyəm? Niyə mənim uşağım bir il arxaya düşməlidir?"

Valideyn həmçinin qızının psixoloji durumunun ağırlaşdığını və onun gələcəyi ilə bağlı ciddi narahatlıq keçirdiyini qeyd edib.

Məsələ ilə bağlı Milli.Az-ın sorğusunu cavablandıran İnşaat Kollecinin direktoru Şəhla Abbasova səsləndirilən iddialarla razılaşmayıb.

Direktor bildirib ki, tələbə ilə bağlı qərar şəxsi münasibətlər əsasında deyil, təhsil qanunvericiliyinin tələblərinə uyğun verilib.

"Valideyn iddia edir ki, tələbənin 16 qaibi var. Lakin sənədlərə əsasən həmin tələbənin praktikadan 18 qaibi mövcuddur. Jurnallar da mövcuddur və istənilən şəxs gəlib baxa bilər. Mən heç bir tələbə ilə şəxsi qərəzlilik aparmıram".

Onun sözlərinə görə, tələbə praktika məşğələlərində demək olar ki, iştirak etməyib və semestr ərzində cəmi bir-iki dəfə dərsə gəlib:

"Dayısı və anası gəlmişdi. Sonra dayısı başladı danışmağa ki, "gəlin bu məsələni insani şəkildə həll edək, bütün müəllimləri yığıb qonaqlıq verərəm, yeməyə-içməyə apararam". Mən də cavab verdim ki, "çox sağ olun, amma buna ehtiyac yoxdur. Heç kimin nəyəsə ehtiyacı yoxdur". Əlavə etdim ki, "o pulu belə işlərə xərcləməkdənsə, uşağa taksi tutardınız, dərsə gələrdi". Yəni, mən heç kimdən rüşvət tələb etməmişəm".

Direktor qeyd edib ki, müəllim tərəfindən səhv yazılmış qaib aşkarlanarsa, həmin qaib silinir, lakin qanuni şəkildə qeyd olunan qaiblərin ləğvi mümkün deyil.

"Təhsil qanunvericiliyinə əsasən, tələbə dərslərin müəyyən hissəsini mənimsəməyibsə, həmin fənni yenidən keçməlidir. Bu qaydalar bütün tələbələr üçün eynidir. Mən həmin qanunları tətbiq edirəm".

Kollec rəhbəri həmçinin valideynin və tələbənin təhsil müəssisəsinə gələrək məsələni jurnalistlərin iştirakı ilə araşdırmasına hazır olduğunu bildirib.

"Valideyn də, tələbə də gəlsin. Jurnallara baxaq, müəllimləri dinləyək, bütün məsələləri araşdıraq. Heç kimdən rüşvət tələb olunmayıb və heç kimə qarşı qərəzli münasibət göstərilmir".

Mina Mikayılova
Milli.Az