Miqren tutması zamanı bu üsul köməyinizə çata bilər

Miqren milyonlarla insanın gündəlik həyat keyfiyyətinə təsir edən ən geniş yayılmış nevroloji problemlərdən biridir. Güclü baş ağrıları, ürəkbulanma, işığa və səsə həssaslıqla müşayiət olunan bu vəziyyət zamanı bir çox insan dərmanlarla yanaşı alternativ üsullara da müraciət edir. Mütəxəssislərin sözlərinə görə, bəzi efir yağları düzgün istifadə edildikdə miqren tutmalarının yaratdığı narahatlığı azaltmağa kömək edə bilər.

Bəs miqren zamanı hansı yağlardan istifadə etmək olar və onlar necə tətbiq edilməlidir?

Milli.Az xəbər verir ki, miqren zamanı nanə yağı ən çox istifadə olunan efir yağlarından biridir və onun tərkibindəki mentol sayəsində sərinləşdirici təsir yaradır, buna görə də gicgah və alın nahiyəsinə 1-2 damcı nanə yağı badam və ya kokos kimi daşıyıcı yağla qarışdırılaraq yüngül masajla tətbiq edilir. Lavanda yağı daha çox stres, gərginlik və yuxusuzluqla əlaqəli miqrenlərdə faydalı hesab olunur və bu yağ diffuzor vasitəsilə otağa yayılaraq nəfəs yolu ilə qəbul edilə bilər, eyni zamanda yastığa çox az miqdarda damızdırılaraq sakitləşdirici təsir əldə olunur. Rozmarin yağı zehni yorğunluq və aşağı qan dövranı ilə bağlı baş ağrılarında istifadə edilir və 1 damcı rozmarin yağı daşıyıcı yağla qarışdırılaraq boyun və çiyin nahiyəsinə masaj olunur, bu isə əzələ gərginliyinin azalmasına kömək edə bilər. Roma çobanyastığı yağı isə sinir sistemini sakitləşdirici təsirinə görə seçilir və əsasən inhalasiya üsulu ilə qoxulama və ya boyun-çiyin nahiyəsinə yüngül masaj şəklində tətbiq edilir.

Mütəxəssislər qeyd edirlər ki, efir yağları mütləq şəkildə birbaşa deyil, daşıyıcı yağlarla qarışdırılaraq istifadə olunmalı, dozanın aşılmamasına diqqət edilməli və xüsusilə hamilə qadınlar və kiçik yaşlı uşaqlarda ehtiyatlı davranılmalıdır. Eyni zamanda aromaterapiya miqrenin əsas müalicəsi deyil, yalnız ağrının intensivliyini azaltmağa kömək edən dəstək üsulu kimi qəbul edilməlidir.

Asya
Milli.Az