Banklarda nəzarət SƏRTLƏŞİR - Vergiyə birbaşa məlumat gedir

Azərbaycanda bankların sahibkarların maliyyə əməliyyatları ilə bağlı məlumatları Vergi Xidmətinə təqdim etməsi qanunvericiliyə əsasən həyata keçirilir.

Milli.Az xəbər verir ki, bunu Mərkəzi Bankın sədri Taleh Kazımov jurnalistlərin suallarınl cavablandırarkən deyib.

Onun sözlərinə görə, qanuna əsasən banklar VÖEN-i olan şəxslərin məlumatlarını mütəmadi şəkildə Vergi Xidmətinə təqdim etməlidir:

"Qanun bu gün deyir ki, banklar sahibkarlıq fəaliyyəti ilə məşğul olan, yəni VÖEN-i olanın məlumatını ayda bir dəfə Vergi Xidmətinə verməlidir".

T.Kazımov qeyd edib ki, debet kart VÖEN-ə bağlı olduqda həmin məlumatlar avtomatik olaraq vergi orqanlarına ötürülür. Əks halda isə proses fərqli işləyir:

"Debet kart VÖEN-ə bağlı deyilsə və bank həmin əməliyyatlarda şübhə görürsə ki, bu sahibkarlıq fəaliyyətidir, onu şübhəli tranzaksiya kimi Maliyyə Monitorinqi Xidmətinə göndərir".

Nəzərə çatdırıb ki, Maliyyə Monitorinqi Xidməti həmin məlumatları təhlil edir və vergidən yayınma və ya digər qanun pozuntusu aşkar etdikdə məlumatı Vergi Xidmətinə və ya aidiyyəti qurumlara yönləndirir:

"Bu normal beynəlxalq praktikadır".

T.Kazımov bildirib ki, biznes fəaliyyəti ilə bağlı əməliyyatlar mütləq sahibkar hesabları üzərindən aparılmalıdır:

"Sahibkarlıq fəaliyyəti ilə əməliyyatları sahibkarlıq hesabları üzərindən keçirsinlər, onda onlara heç kim toxunmayacaq".

Əlavə edib ki, fiziki şəxslərin kartları üzərindən gün ərzində onlarla və ya yüzlərlə köçürmə şübhə yarada bilər və bu halda banklar araşdırma aparır.

T.Kazımov qeyd edib ki, şübhəli əməliyyatlar yalnız vergidən yayınma ilə bağlı deyil, həm də çirkli pulların yuyulması və ya dələduzluq ehtimalları ilə əlaqədar araşdırılır

"Fərqi yoxdur fiziki şəxsdir, ya hüquqi şəxs. Şübhəli əməliyyat varsa, Maliyyə Monitorinqi bunu təhlil edir".

Mina Mikayılova
Milli.Az