Şokolad sızanaq yaradır?

Şokoladın sızanaq yaratdığına dair iddialar tez-tez səsləndirilir.

Bəs bu nə dərəcədə doğrudur, yoxsa sadəcə valideynlərin şirniyyat istəyən uşaqlara dediyi bir bəhanədir?

Milli.Az xəbər verir ki, türkiyəli dermatoloq Dr. Zeynəb Laftahın sözlərinə əsasən, klinikaya müraciət edən xəstələrin böyük əksəriyyəti sızanaqlarını azaltmaq üçün hansı qidaları rasiondan çıxarmalı olduqlarını soruşur. Şokolad isə ən çox maraq doğuran məhsullardan biridir.

Həkim qeyd edib ki, sızanaqların yaranmasında əsas rol genetik meyilliliyə məxsusdur. Bununla belə, bəzi qidalar orqanizmdə iltihabı artıraraq vəziyyəti ağırlaşdıra bilər. Xüsusilə süd məhsulları kimi bəzi qidaların bəzi insanlarda güclü reaksiya yaratdığı və bunun allergiya ilə bağlı ola biləcəyi vurğulanır.

Mövzu ilə bağlı aparılan araşdırmalar isə hələ də qəti nəticə ortaya qoymayıb. Məsələn, 2011-ci ildə keçirilən kiçik miqyaslı bir tədqiqatda 100% tünd şokoladın sızanaqları artırdığı müşahidə edilsə də, araşdırma cəmi 10 nəfər üzərində aparılıb və nəzarət qrupu olmayıb.

Sızanaqla qidalanma arasındakı əlaqə əsasən qidaların qlisemik indeksi ilə izah edilir. Yüksək qlisemik indeksə malik qidalar qanda şəkəri sürətlə artırır, bu isə insulin səviyyəsinin yüksəlməsinə, nəticədə iltihabın artmasına və dəri yağlanmasının çoxalmasına səbəb olur. Bu proses məsamələrin tıxanmasına və sızanaqların yaranmasına gətirib çıxarır.

Bununla belə, şokoladın qlisemik indeksi aşağıdan orta səviyyəyə qədər dəyişir. Lakin yüksək şəkər və yağ tərkibli şokoladların sızanağa təsir ehtimalı daha yüksək hesab olunur. Tünd şokolad isə nisbətən daha az şəkər ehtiva etdiyi üçün daha az riskli sayılır.

Bildirilir ki, sızanaqlarla mübarizədə qidalanma tək faktor deyil və hər bir insanın orqanizmi qidalara fərqli reaksiya verə bilər. Buna görə də problemin səbəbini müəyyən etmək üçün fərdi yanaşma vacibdir.

Mina Mikayılova
Milli.Az