Cəmiyyət

Nazir: “Ötən il Azərbaycanda adamı girovgötürmə və banditizm cinayətləri baş verməyib”

29 Yanvar 2010 13:54

Baxış: 1 360

VTB-də yüksək depozit faizleri daha çox qazandırır

Daxili İşlər Nazirliyinin rəsmi saytında deyilir ki, bu barədə daxili işlər naziri, general-polkovnik Ramil Usubov ilin yekunları ilə bağlı kollegiya iclasında çıxışında bildirib. Nazir qeyd edib ki, qanunsuz saxlanılan 1115 odlu silah və 166 mindən çox patron götürülüb. Odlu silahın tətbiqi ilə törədilən cinayətlərin sayı 72 fakt olmaqla, 2008-ci illə müqayisədə sabit qalıb.

R.Usubov həmçinin deyib ki, hesabat dövründə bütün subyektlər üzrə 22830 cinayət qeydə alınıb. Adamları girov götürmə və banditizm cinayətləri isə, ümumiyyətlə, baş verməyib.

Onun sözlərinə görə, qanunsuz dövriyyədən 1 ton 23 kiloqram narkotik vasitə çıxarılıb. Bu tip cinayət əməlinə görə, 267 nəfərdən ibarət 99 cinayətkar qrup və dəstə zərərsizləşdirilib.

Daxili işlər orqanlarının keçirdiyi "Xaş-xaş-2009" şərti adlı kompleks əməliyyat-profilaktik tədbirləri ilə ümumi çəkisi 453 tondan artıq narkotik tərkibli bitki aşkarlanaraq yaşıl kütlə halında məhv edilib.
Ötən il 80 insan alveri cinayəti aşkarlanaraq 76 nəfər məsuliyyətə cəlb olunub, 55 nəfərdən ibarət 25 cinayətkar qrup zərərsizləşdirilib. Bu cinayətlərin qurbanı olmuş 91 şəxs müəyyən edilib.

Yerli və dövlətlərarası axtarışda olan 2441, o cümlədən MDB və digər xarici ölkələrdə gizlənmiş 134 təqsirləndirilən şəxs tutulub. İnterpolun Azərbaycanda Milli Mərkəzi Bürosu tərəfindən beynəlxalq axtarışda olan 67 nəfərin və İnterpola üzv ölkələr tərəfindən axtarılan 23 şəxsin yeri müəyyən edilib.

Milli.Az