Antibiotiklər uşaqlarda hansı hallarda qadağandır? - AÇIQLAMA

Antibiotiklər tibbin ən böyük nailiyyətlərindən biri sayılsa da, onlardan düzgün istifadə edilməməsi, xüsusilə uşaqlarda ciddi problemlərə yol aça bilər.

Milli.Az xəbər verir ki, bu barədə pediatr Aynur Adıgözəlova "Sağlam radio"nun (93 FM) "Sağlam səhər" verilişində danışıb.

Həkimin sözlərinə görə, bəzi valideynlər uşağın tez sağalacağını düşünərək ilkin xəstəlik əlamətlərində həkimə müraciət etmədən antibiotik verməyə üstünlük verirlər. Bu yanaşma isə ən ciddi problemlərdən biri olan antibiotiklərə qarşı davamlılığın yaranmasına səbəb olur. Lazımsız və ya düzgün dozada istifadə edilməyən antibiotiklər bakteriyaların həmin dərmanlara uyğunlaşmasına gətirib çıxarır və gələcəkdə real ehtiyac yarandıqda müalicə effekt vermir. Bundan əlavə, bəzi uşaqlarda antibiotiklər güclü allergik reaksiyalar törədə bildiyi üçün istifadə edilə bilən dərmanların sayı da məhdudlaşır.

Aynur Adıgözəlova qeyd edib ki, allergiya sadə dəri səpkilərindən tutmuş, həyati təhlükə yaradan anafilaktik reaksiyalara qədər fərqli formalarda özünü göstərə bilər. Buna görə də tibbi personal antibiotik təyin etməzdən əvvəl mütləq sınaq aparır və reaksiya aşkarlanarsa həmin preparatın istifadəsi qadağan edilir. Valideynlərin isə bu qaydalara bəzən əməl etmədiyi vurğulanıb.

Pediatr xatırladıb ki, antibiotiklər virus mənşəli xəstəliklərdə təsirsizdir. Soyuqdəymə, qrip, öskürək kimi hallar əksər vaxt viruslarla əlaqəli olur və bu zaman antibiotik istifadəsi nə sağalma müddətini qısaldır, nə də müalicəyə fayda verir. Əksinə, uşağın orqanizmi əlavə dərman yükü ilə üzləşir.

Mütəxəssis həmçinin antibiotiklərin immun sisteminə mənfi təsirindən danışıb. Onun sözlərinə görə, bu dərmanlar faydalı və zərərli bakteriyaları ayırd edə bilmədiyi üçün bağırsaq mikroflorasına ciddi zərər vurur. Nəticədə disbakterioz, ishal, qarın ağrısı, köp və həzm pozğunluqları yarana bilər və bağırsaq florasının bərpası uzun müddət tələb edə bilər.

Aynur Adıgözəlova bildirib ki, bakterial infeksiyalar zamanı orqanizmin immun sistemi maksimum səviyyədə işləyir və bu da uşaqda halsızlıq, yorğunluq, yuxu pozuntuları və əhvalın düşməsi kimi hallar yaradır. Valideynlər isə çox vaxt bu əlamətləri dərmanların fəsadı kimi qiymətləndirərək əlavə müalicəyə ehtiyac olduğunu düşünürlər. Halbuki əksər hallarda xəstəlik ağırlaşmadan keçdikdən sonra düzgün qidalanma, kifayət qədər maye qəbulu və normal yuxu rejimi uşağın tədricən bərpası üçün kifayət edir.

Asya
Milli.Az