Cəmiyyət

Masazırda “Məzun evi”ndə böhran: 370 ailə isti susuz qalıb

18 Dekabr 2025 11:33

Baxış: 458

VTB-də minimal faiz dərəcəsi ilə nağd kredit 10.49%-dən

#CƏMİYYƏT

Masazır qəsəbəsində dövlətin valideyn himayəsindən məhrum olmuş gənclər üçün inşa etdiyi "Məzun evi" layihəsinin sakinləri ciddi problemlə üz-üzə qalıblar.

Milli.Az xəbər verir ki, binanın qazanxanası işləmir, nəticədə sakinlər isti sudan istifadə edə bilmirlər.

Sakinlərin sözlərinə görə, gündəlik gigiyena və normal yaşayış şəraiti üçün vacib olan isti suyun olmaması ailələr üçün ciddi çətinlik yaradır.

Qeyd edilir ki, üç binadan ibarət kompleksdə 370-ə yaxın ailə yaşayır. Ailələrin əksəriyyətində isə azı iki, bəzi hallarda isə üç-dörd uşaq var. İsti suyun uzun müddət verilməməsi xüsusilə uşaqların sağlamlığı üçün risk yaradır.

"İsti su yoxdur, normal təmizlik imkanımız qalmayıb. Uşaqlarımız xəstələnir. Dəfələrlə müraciət etmişik, amma konkret nəticə yoxdur", - deyə sakinlər qeyd ediblər.

Məsələ ilə bağlı Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyi ilə əlaqə saxladıq.

Milli.Az-ın sorğusuna cavab olaraq bildirildi ki. Sosial Xidmətlər Agentliyinin "Məzun evi" sosial xidmət müəssisəsi çoxmənzilli 3 yaşayış binasından ibarətdir.

Qeyd olunub ki, burada uşaqlar üçün sosial xidmət müəssisələrinin və təhsil müəssisələrinin valideynlərini itirmiş və valideyn himayəsindən məhrum olmuş 365 məzunu mənzillə təmin olunub. Müəssisədə onlara həm də sosial-psixoloji, sosial-hüquqi və digər xidmətlər göstərilir.

"Bildiririk ki, ərazidə mütəmadi olaraq monitorinqlər aparılır və bütün çatışmazlıqlar aradan qaldırılır. Sakinlərin istiliklə bağlı yaranan narahatlığının aradan qaldırılması istiqamətində də müvafiq işlər artıq yekunlaşmaq üzrədir", - deyə qurumdan məlumat veriib.

Mina Mikayılova
Milli.Az