Yeni binalarda ən azı 3 internet şirkəti olmalıdır - MTK-ların məhdudiyyəti qanunsuzdur - AÇIQLAMA

Çoxmənzilli binalarda ən azı 3 fərqli provayderin xidmət göstərməsi abonentlərin seçim hüququnun təmin edilməsi və rəqabətin formalaşması baxımından zəruri hesab olunur.

Milli.Az xəbər verir ki, bu fikirlər İnformasiya Kommunikasiya Texnologiyaları Agentliyində (İKTA) çoxmənzilli yaşayış komplekslərində (MTK) internet xidmətlərinin göstərilməsi və rəqabət mühitinin gücləndirilməsi mövzusunda telekommunikasiya operatoru və provayderləri ilə keçirilən görüşdə deyilib.

Lakin bəzi MTK-larda yalnız bir internet provayderinin istifadəsinə icazə verirlir.

Bəs, bu nə dərəcədə qanunidir?

Məsələ ilə bağlı Milli.Az-a açıqlama verən informasiya texnologiyaları üzrə eskpert Elvin Abbasov bildirib ki, İnformasiya Kommunikasiya Texnologiyaları Agentliyinin (İKTA) çoxmənzilli binalarda ən azı 3 provayderin xidmət göstərməsini tələb etməsi, ilk növbədə, Azərbaycan Respublikasının İstehlakçıların Hüquqlarının Müdafiəsi haqqında Qanununa və Rəqabət Məcəlləsinin prinsiplərinə əsaslanır.

Onun sözlərinə görə, MTK-ların qəsdən yalnız bir provayderə icazə verməsi vətəndaşların seçim hüququnu birbaşa məhdudlaşdırır və bazarda süni inhisarçı mühit yaradır.

E.Abbasov qeyd edib ki, bu məhdudiyyət qanuni deyil, çünki ədalətli rəqabəti boğur, provayderlərin bazara sərbəst çıxışını əngəlləyir və abonentləri məhdud qiymət, keyfiyyət və texnologiya şərtləri ilə razılaşmağa məcbur edir:

"Beləliklə, MTK-nın qoyduğu bu məhdudiyyət qanunvericiliyin fundamental prinsiplərinə ziddir və hüquqi müstəvidə mübahisə predmeti ola bilər".

İKTA-nın "ən azı 3 provayder" tələbinin rəqəmsal infrastruktura çıxışın keyfiyyətini və əlçatanlığını artırmaq məqsədi daşıyan doğru strategiya olduğunu vurğulan ekspert əlavə edib ki, üç provayderin mövcudluğu həm keyfiyyəti artırır, həm də qiymət rəqabətini təmin edir:

"MTK-lar tərəfindən tətbiq edilən maneələr (məsələn, qeyri-rəsmi gəlir əldə etmək üçün inzibati təzyiqlər) həmin binanın sakinlərinə qarşı yönəlmiş qeyri-münasib hərəkət hesab edilməlidir. Abonentlərin seçim hüququnun təmin edilməsi üçün Agentlik tərəfindən rəsmi müdaxilə mexanizminin gücləndirilməsi və MTK-ların bu sahədəki məsuliyyətinin qanunvericiliklə daha dəqiq tənzimlənməsi zəruridir".

Mina Mikayılova
Milli.Az