Cəmiyyət

25 min manatlıq ziyan dəydi, günahkar kimdir?

20 May 2025 23:07

Baxış: 368

VTB-də minimal faiz dərəcəsi ilə nağd kredit 10.49%-dən

#ŞİKAYƏT

Son dövrlərdə ölkəmizin müxtəlif bölgələrində baş verən güclü leysan yağışları və daşqınlar kənd təsərrüfatı sahəsində ciddi problemlərə yol açıb.

Milli.Az xəbər verir ki, Zaqatala rayonunun Aşağı Çardaxlar kəndində əkin sahələrinin su altında qalması bu problemin daha da kəskinləşməsinə səbəb olub. Bu cür təbii fəlakətlər həm kənd sakinlərinin, həm də yerli iqtisadiyyatın inkişafını təhdid edir. Aşağı Çardaxlar kəndində baş verən sel hadisəsi kəndin üzləşdiyi daimi və təkrarlanan daşqın probleminin daha da ağırlaşdığını göstərir.

Əkin sahələrinin 200 hektardan çoxu, xüsusən taxıl və yonca sahələri su ilə dolub, bu isə kənd sakinlərinə maddi cəhətdən böyük ziyan vurub. Kənd sakinlərindən biri bildirib ki, bu hadisə nəticəsində təxminən 20-25 min manatlıq ziyan görüb və iki-üç ildən bir belə daşqınlar təkrarlanır:

"Taxılı, yoncanı, hər şeyi su aparıb. Təxminən 20-25 min manatlıq ziyan görmüşəm. İki-üç ildən bir bu problem təkrarlanır. Biz bilirik ki, hansı yerləri bağlamaq lazımdır. Texnika göndərilsə, bu cür su daşqınlarının qarşısını almaq olar" - deyə kənd sakini bildirib.

Onun sözlərinə görə, bu cür hadisələrin qarşısını almaq üçün yerli idarəetmə və müvafiq qurumlar tərəfindən daha səmərəli tədbirlər görülməsi zəruridir.

Məsələ ilə bağlı Zaqatala Su Melorasiya Sistemlərinin İstismarı İdarəsindən baş mühəndisi Ceyhun Mirzəyev bildirdi ki, suyun çəkilməsindən sonra əməkdaşlarımız tərəfindən operativ olaraq həmin ərazidə sahil bərkitmə işləri görüləcək. Qabaqlayıcı tədbirlər görülməsinə baxmayaraq çaylarda suyun səviyyəsinin artması nəticəsində Katex çay öz suyunu ötürə bilməyib.

Aşağı Çardaxlar Kənd İcra nümayəndəsi İlahə Vəliyevanın sözlərinə görə isə məsələ ilə bağlı aidiyyatı qurumlara xəbərdarlıq edilib.

Aysel Əkbər
Milli.Az