Cəmiyyət

Günel Anarqızının “Sərhədsiz səma” kitabının təqdimatı oldu

19 May 2025 16:15

Baxış: 439

VTB-də minimal faiz dərəcəsi ilə nağd kredit 10.49%-dən

#CƏMİYYƏT

Mayın 16-da Azərbaycan Dövlət Milli İncəsənət Universitetində yazıçı publisist Günel Anarqızının "Sərhədsiz səma" kitabının təqdimatı və universitetin müəllim və tələbə heyəti ilə görüşü keçirildi.

Açılış nitqi ilə Ədəbiyyat və dillər kafedrasının müdiri, filologiya elmləri doktoru, professor Fəridə Səfiyeva çıxış etdi.

O, Günel Anarqızının yaradıcılığı, ictimayi fəaliyyəti və yeni kitabı haqqında məlumat verdi. Sonra Ədəbiyyat və dillər kafedrasının dosenti, pedaqogika üzrə fəlsəfə doktoru Sevinc Həsənova söz alıb yazıçının yeni kitabında yer alan əsərlərin tələbələr arasında maraqla qarşılandığı və həvəslə hazırlandığı haqqında danışdı. Daha sonra "Sərhədsiz səma" kitabında yer alan əsərlər əsasında ədəbi-bədii kompozisiya aktrisa Günel Həsənovanın ifasında nümayiş olundu.

Tədbirdə həmçinin tələbələr Şəhla Sadıqova və Zəhra Abdulqədirova Günel Anarqızının "Şuşaya məktub", Lalə Cəlili "Əsgərə məktub", Əliağa Tapdıqlı və Firuzə İsmayıl "Bayrağa ithaf", Nihad Kərimov, Aişə Şirinova və İlahə Şirbidova "16 səbəb" hekayələrini səsləndirdilər. Tədbiri "Şuşanın dağları", "Xudayar təsnifi" ilə tələbələr Fərid Əzizli, Nihad Quliyev və Nigar Əlizadə məharətli ifaları ilə rəngləndirdilər.

Sonda yazıçı Günel Anarqızı tədbirin təşkilatçılarına dərin təşəkkürünü bildirdi, müəllim və tələbələrin suallarına cavab verdi və kitablarını imzaladı.

Yekunda müəllif cənab Prezident İlham Əliyevə sənət adamları üçün yaratdığı əlverişli şəraitə və göstərdiyi diqqətə görə dərin təşəkkürünü bildirdi.

Milli.Az