Cəmiyyət

"İlon Maskın təyinatı Amerika dövlətinin sabitliyinə təhlükə yarada bilər" - Ekspert

5 Fevral 2025 18:32

Baxış: 328

#DÜNYADA #ABŞ

"Amerikada İlon Maskın yüksək dövlət vəzifəsinə təyinatı ciddi risklərə səbəb ola bilər. Bunun ilkin işartısı olaraq Maskın 2 trilyon dollarlıq aqressiv ixtisar təklifləri gündəmə gəlib. Müxtəlif sahələrdə uğur qazanmış bir iş adamı olan Mask dövlət idarəçiliyi və sahibkarlığın fərqli bacarıqlar tələb etdiyini unuda bilər".

Milli.Az xəbər verir ki, bunu iqtisadçı ekspert Eldəniz Əmirov deyib.

O bildirib ki, əksər ölkələrdə biznes sahəsində uğurlu idarəçilərin dövlət məmuru vəzifəsinə təyinatı gözlənilən nəticələri verməyib. Bu tip təyinatlar tez-tez daha çox problemlərə yol açıb. Çünki dövlət maliyyəsi və büdcə idarəçiliyi, özəl sektorda qərarların çevik və bazar şərtlərinə uyğun verilməsi ilə müqayisədə daha mürəkkəb və bürokratik prosesləri əhatə edir.

"Maskın qeyri-ənənəvi idarəçilik yanaşması, riskə meylliliyi və sərt ifadələri ilə tanınması, Amerika kimi böyük dövlətin sabitliyini poza bilər. Onun fiskal siyasət və makroiqtisadiyyat sahəsində təcrübəsi yoxdur. Dövlət büdcəsini düzgün idarə etmək, iqtisadiyyatda balansı qorumaq üçün xüsusi biliklər tələb edir. Maskın biznesdə tətbiq etdiyi aqressiv strategiyalar, dövlət idarəçiliyində isə uzunmüddətli iqtisadi və sosial problemlərə səbəb ola bilər. Fiskal siyasət yalnız xərcləri azaltmaqla bitmir; düzgün vergi siyasəti, sosial proqramların idarə edilməsi və borc dinamikası da vacibdir.

Maskın riskə meylli yanaşmaları, dövlət büdcəsi və fiskal siyasətini idarə etmək üçün uyğun olmaya bilər. Onun rəhbərlik tərzi və prioritetləri, Amerika dövlətinin uzunmüddətli sabitliyinə ciddi təsir göstərə bilər. Bu məsələnin nəticələri zamanla daha aydın olacaq".

Asya
Milli.Az