Bakıda narkomanların yeni məskəni - QURUMLARDAN AÇIQLAMA

Dünya şöhrətli musiqiçilər Leopold və Mstislav Rostropoviçlərin ev muzeyinin yerləşdiyi binada qanunsuz olaraq söküntü işləri aparılıb.

Binada yaşayanların bir çoxu evlərini sataraq başqa yerə köçüblər. Daha sonra mülkiyyətçi tərəfindən bu binada qanunsuz söküntü işlərinə başlanılıb. Hal-hazırda sakinlər bu vəziyyətdə qorxu içində yaşamağa davam edirlər.

"Buranı park edəcəklər deyirlər, amma binanı tamamilə sökərək hər şeyi açıq qoyublar. İndi küçənin iti, pişiyi və narkomanları buradadır", - deyə bina sakinlərindən biri şikayətlənib.

Milli.Az xəbər verir ki, məsələ ilə bağlı Dövlət Şəhərsalma və Arxitektura Komitəsindən bildirilib ki, Bakı Şəhər Memarlıq və Şəhərsalma Baş İdarəsi tərəfindən Yasamal rayonu, Rostropoviçlər, 19 ünvanında şəhərsalma nəzarəti qaydasında monitorinq keçirilib və sözügedən ünvanda yerləşən yerli əhəmiyyətli tarix və mədəniyyət abidəsində qanunsuz söküntü işlərinin aparılması faktı aşkarlanıb.

Baş İdarə əməkdaşları tərəfindən qanunsuz görülən işlər bir müddət əvvəl dayandırılıb və müvafiq tədbirlərin görülməsi üçün aidiyyəti qurumlara, həmçinin tarixi abidə olduğu nəzərə alınaraq Mədəniyyət Nazirliyinə məlumat verilib.

Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin Bakı Regional İdarəsindən isə bildirilib ki, yanvarın 9-da Yasamal rayonu, Rostropoviçlər küçəsi, 19 ünvanında yerləşən 5595 inventar nömrəli yerli əhəmiyyətli memarlıq abidəsinə müdaxilə faktı aşkar edilib.

Abidəyə baxış keçirilən zaman qanunsuz söküntü işlərinin aparıldığı müəyyən olunub. Aidiyyəti dövlət orqanlarının əməkdaşları ilə birgə söküntü işləri dayandırılıb. Aparılan qanunsuz müdaxilə hallarının aradan qaldırılması ilə bağlı xəbərdarlıq olunub. Buna baxmayaraq, 19 yanvar tarixində qanunsuz söküntü işlərinin yenidən təkrarlandığı aşkar edilib.

Fakt üzrə Dövlət Şəhərsalma və Arxitektura Komitəsi yanında Bakı Şəhər Memarlıq və Şəhərsalma Baş İdarəsi ilə birgə qanunsuz görülən işlər dayandırılıb. Abidənin əvvəlki vəziyyətinə qaytarılması üçün tədbirlər davam etdirilir. 

Asya
Milli.Az