Bilik, yoxsa tıxac günü? - Çıxış yolları...

Bu gün demək olar ki hər kəs Bakı yollarındakı tıxacdan danışır. Sosial şəbəkə istifadəçiləri, xüsusən də universitetə, məktəbə getməyənlər tıxaclardan gileylənir, jurnalistlər bu mövzu barədə ekspertlərin rəyini alır, sujetlər, yazılar hazırlanır, yüzlərlə insan işə gecikir. Bu günün gəlməyinə sevinənlər deyəsən təkcə məktəblilər və birinci kurs tələbələridir.

Hamı Bakıda tıxacların artmasını bilik günü ilə əlaqələndirir. Sözsüz ki, bir şagirdi birinci sinifə aparmaq üçün dörd nəfərin onunla birlikdə getməsi tıxacı artıran amildir. Amma, məsələ burasındadır ki, Bakıda tıxac bugün peyda olmayıb. Dünən də var idi, bugün də var, sabah da olacaq. Artıq Bakıda tıxac ancaq pik saatlarda deyil, günün istənilən saatında olur.

Pik saatlarda tıxacların yaranmasının səbəbi aydın məsələdir ki, hər kəsin eyni vaxtda işə getməsi ilə əlaqədardır. Adi vaxtlarda yaranan tıxacların səbəbi isə əsasən yolda baş verən qəzalar, işıqforun işləməməsi, hansısa avtomobilin xarab olaraq yolda qalması, qaydaları pozan sürüclərin avtomobili harda necə gəldi saxlaması, bəzi yollarda avtobuslar üçün dayanacaqların yolun hərəkət hissəsində qurulması və başqa bu kimi səbəblərdir.

Tıxaclardan necə qurtulmaq olar?

Pandemiya zamanı məhdudlaşdırıcı tədbirlər nəticəsində yollarda yaranan boşluq, ictimai nəqliyyatdakı rahatlıq sübut etdi ki, tələbələr və məktəblilər olmayan zaman tıxaclar daha az olur. Həmçinin yay tətilində də bunun şahidi oluruq. Buradan belə nəticəyə gəlmək olar ki, məktəblərin əsas yollardan kənarda tikilməsi daha məqsədəuyğun olar. Çünki, övladını götürmək üçün yolun hərəkət hissəsində avtomobilini saxlayan hər sürücü yolda tıxaca səbəb olur. Məsələn Azadlıq prospektindəki, İstiqlaliyyət küçəsindəki sıxlıqların əsas səbəbi oradakı məktəblərdən uşaqlarını avtomobillə götürərkən qaydapozan valideynlərdir. Bundan başqa universitetlərin də bölgələrə köçürülməsi və ya universitetlər şəhərciyinin tikilməsi tıxacdan qurtuluş yolu ola bilər. İş saatlarının dəyişdirilməsi, insanların müxtəlif saatlarda işə getməsi də bu məsələnin həllində vacib amildir. Tıxacsız Bakı üçün yeganə çıxış yolu isə sürücülük vəsiqəsinin verilməsi qaydalarının sərtləşdirilməsidir.

Bəxtiyar Umarlı
Milli.Az