Azərbaycanlı məşhurlar bu yay harada istirahət edəcəklər? - SORĞU

Kimisi yaradıcılığı ilə bağlı qastrol səfərlərinə çıxır, kimisi isə şəxsi iş dalınca gedir. Bəs görəsən isti yay günlərində onlar istirahət üçün hara üz tuturlar?

Milli.Az xəbər portalı bu sualla bəzi tanınmışlara müraciət etdi.

Xalq artisti Nazpəri Dostəliyeva: "Təbii ki, il boyu gərgin iş prosesindən sonra gərək yaxşıca istirahət edəsən. Amma neyləmək olar ki, yay aylarında da, necə deyərlər, "işimiz başımızdan aşır". Hələ qarşıdakı 2 ay ərzində görüləsi o qədər işim var ki. Məhz bu üzdən vaxt tapan kimi əzizlərimizlə sadəcə, bağ evimizə yollana bilirəm. Bu il heç bir yerə gedə bilməyəcəm".

Xalq artisti Faiq Ağayev: "Hələlik, bu haqda dəqiq məlumat verə bilmərəm. Çünki mən adətən, istirahətə 1 həftə qalmış məkan barədə fikirləşirəm. Çox vaxt uzaq ölkələrə səyahət etməyi xoşlayıram. Neçə ildir arzusundayam ki, Dominikan Respublikasına gedim. Hər zaman olduğu kimi sakit istirahəti sevirəm. Çox vaxt tək istirahət etməyi xoşlayıram. İstirahətdə təxminən 7 gün və ya 14 gün qala bilirəm".

Xalq artisti Yaşar Nuri: "Yay ərzində heç yerə getmək fikrində deyiləm. İstirahətimi Bakıda keçirəcəyəm. Bir də ki, mən müalicə üçün yenidən Türkiyəyə getmək fikrindəyəm".

Müğənni Sevda Yahyayeva: "Əslində çox istərdim ki, digər ölkəyə gedib yaxşıca istirahət edim. Amma işlərim çoxdur. Ola bilsin, avqust ayında 10 günlük istirahətə getdim. Dünyanın istəlin yeri ola bilər. Dəqiq bir məkan seçməmişəm. Onu bilirəm ki, bu istirahət ancaq avqust ayında baş tuta bilər".

Müğənni Nura Suri: "Bu yay da hər il olduğu kimi, ailəlikcə Türkiyəyə səfər etmək istəyirdik. Amma planlarım dəyişdi. Çünki evimi yenidən təmir etdirirəm. Çox istəyirdim bütün ailəmi başıma toplayıb, 1 həftəlik Türkiyəyə gedəm. Amma evimə görə alınmadı.  Elə bu səbəbdən də istirahətimizi bağ evimizdə edəcəyik. Yenə də ailəmlə, əzizlərimlə birgə olacağam".

Müğənni Xuraman Şuşalı: "Əgər həkimlər icazə versə, planlarımız çox böyükdü. Ancaq uşağımız hələ körpədir. Həkimər məsləhət bilsə, getmək istədiyim bir neçə yer var - Türkiyə, Dubay. Oraları həm gəzmək istəyirəm, həm də alış-veriş etmək fikrim var. Ailəmlə birgə getməyi planlaşdırıram. Bildiyiniz kimi, mənim yoldaşım rejissordur. Digər ölkələrə getsəm, orada mənə klip çəkəcək. İstəyirəm fərqlilik olsun. Amma bununla yanaşı, mamamı Yessentukiyə aparmaq istəyirəm. Müalicə almasına ehiyacı var. Bir sözlə, planlarım çox böyükdür".

Müğənni Elnur Məmmədov: "Ailə həyatı qurandan sonra əgər vaxtımız olsa, o zaman Avropa ölkələrinə bal ayına gedəcəyik. Amma düşünmürəm ki, vaxtım olsun. Təsəvvür edin ki, toyun səhəri günü məni dövlət tədbirinə çağırıblar".

Birgə istirahət edən məşhurlar

Müğənnilər Rəhim Rəhimli və Röya Ayxan

Rəhim Rəhimli: "Hər zaman olduğu kimi, mən bu yay da sevdiyim Türkiyədə istirahət edəcəm. Amma bu il bir az fərqli olacaq. Çünki bu yay mənim və həmkarım Röyanın ailəsi ilə birgə Türkiyənin Quş Adasına istirahətə gedəcəyik. Bir həftə istirahət etməyi düşünürük".

Prodüser Tarix Əliyev (Tolik) və stilist Anar Ağakişiyev

Tolik: "Bu il stilist Anarla qeyri-adi istirahət etməyi düşünürük. Belə ki, gəmi ilə 14 günlük kruizə çıxmağı planlaşdırırıq. Bu kruizə viza almamaq üçün ya İstanbuldan ya da İtaliyadan gedilir. Bu səfəri ilk dəfə olaraq, iyul ayında həyata keçirməyi planlaşdırırıq. Həmin kruiz gəzintisində çox zaman 1000-1500 nəfər insan olur. Çox istəyirik ki, alınsın. Amma "Titanik" gəmisi kimi batmasaq, yaxşı olar".

Mələk
Milli.Az