Oteldə səhər "açıq bufet"də bunlardan uzaq durun - Təhlükəli qidalar

"Hər şey daxil" sistemi ilə istirahət edənlər üçün otellərdə təqdim olunan zəngin səhər yeməyi cəlbedici görünsə də, mütəxəssislər bəzi qidaların həm həzm sisteminə, həm də bədən çəkisinə mənfi təsir göstərə biləcəyini bildirirlər.

Milli.Az xarici KİV-ə istinadən xəbər verir ki, klinik dietoloq Roksana Sroda səhər "açıq bufet" zamanı hansı qidalardan uzaq durmağın daha doğru olduğunu açıqlayıb. Mütəxəssis ilk növbədə avtomatlardan təqdim olunan şirə və içkiləri seçməməyi tövsiyə edir. Onun sözlərinə görə, bu məhsulların əksəriyyəti yüksək şəkər tərkibli, su ilə durulaşdırılmış və ucuz qarğıdalı siropu əlavə edilmiş içkilərdən ibarət olur. Dietoloq həmçinin kiçik sosislər və keyfiyyətsiz ət məhsullarından da uzaq durmağı məsləhət görür. Bu məhsullar adətən çoxlu duz və fosfat ehtiva edir, lakin keyfiyyətli zülal baxımından kasıb olur.

Mütəxəssis otellərdə təqdim olunan qarışdırılmış yumurtaya da diqqət yetirməyi tövsiyə edir. Onun sözlərinə görə, bəzi otellərdə bu yemək təzə yumurtadan deyil, yumurta tozundan hazırlanır və su hamamında uzun müddət saxlanılır. Qadağan olunan məhsullar siyahısına şirin səhər yarmaları, müsli və sənaye üsulu ilə hazırlanmış şirniyyatlar da daxildir. Bu məhsulların yüksək qlisemik indeksə malik olması qanda şəkərin sürətlə yüksəlməsinə səbəb olur. Nəticədə isə qısa müddət sonra enerji azalır və yenidən aclıq hissi yaranır. Bununla yanaşı, sağlam seçim etmək çətin deyil. Dietoloq ağ undan hazırlanmış şirniyyatlar əvəzinə tam taxıllı və ya çovdar çörəyi, təbii pendirlər, keyfiyyətli ət məhsulları, təzə meyvə və tərəvəzlər, həmçinin qaynadılmış və ya tavada bişirilmiş yumurtaya üstünlük verməyi tövsiyə edir. Bu qidalar daha uzun müddət toxluq hissi yaradır və gün ərzində enerjinin qorunmasına kömək edir./Lent.az

Müəllif: Ülkər Vəliyeva (Milli.Az redaktor)