Siyasət

Düşmən savaş istəyirsə, alacaq

26 Oktyabr 2021 11:10
Baxış: 1 500

"Müharibə başa çatıb və düzdür, bizi hələ döyüşməyə məcbur edirlər, biz də hazırıq".

Prezident İlham Əliyevin Qubadlının işğaldan azad edilməsinin ildönümü ilə bağlı keçirilən mərasimdə səsləndirdiyi bu fikirlər tarixi bir bəyanat, bir mesaj kimi qəbul edilə bilər. Prezident rayon ictimaiyyətinin nümayəndələri ilə görüşdə bir daha bəyan edib ki, "bu Qələbə bütün dünyaya bizim böyük xalq olduğumuzu göstərdi, eyni zamanda, bizi sözün yaxşı mənasında məcbur edir ki, biz qabağa ancaq düz yolla gedək. Bax, sizinlə bərabər, bütün Azərbaycan ictimaiyyəti ilə bərabər biz bu yolu gedəcəyik. İndi mən hansı statusda bu yolu gedəcəyəm, o, ikinci məsələdir. Əsas odur ki, ömrümün sonuna qədər mən bu yolla gedəcəyəm, İnşallah, sizinlə bərabər".

Bəli, Azərbaycan 44 günlük müharibədə sözün əsl mənasında dünya hərb tarixinə qızıl hərflərlə yazılacaq günlər yaşatdı. Məhz aparılan uğurlu siyasətin nəticəsidir ki, bu gün ölkəmiz bütün sahələrdə olduğu kimi, hərbi sahədə də ən qüdrətli dövlətlərdən birinə çevrilib. Dövlət başçısının da söylədiyi kimi, bu gün dövlətimiz istər siyasi meydanda, istər hərbi meydanda öz sözünü deyib. "Biz artıq göstərmişik ki, heç kimin qabağında baş əyən xalq deyilik" deyən dövlət başçısının bu sözləri bir mesaj kimi qəbul edilməlidir. Prezident bu mesajı 44 günlük müharibədə məğlub edilməsinə baxmayaraq revanşist əhval-ruhiyyədə olan qüvvələrə yönəlib. Həmin qüvvələr və onların havadarları anlamalıdırlar ki, hər hansı bir təxribat və yaxud revanşizm cəhdi yerindəcə məhv ediləcək.

Ermənistan və ona havadarlıq edən qüvvələr prezidentin bu sözlərindən dərs çıxarmalıdır. Anlamalıdır ki, 44 günlük zəfərin bitmədiyini bəyan etməklə özlərini daha da rəzil duruma salmış olurlar. Ötən ilin bu günlərində dünyanın elə bir dövləti qalmadı ki, ona müraciət etməsinlər. Hərbi əməliyyatların dayanmasında vasitəçilik etmələrini xahiş etdilər. Yalnız 44-cü gündə Azərbaycanın tələbi yerinə yetirildikdən sonra biabırçı razılaşmaya imza atmalı oldular. Həmin razılaşmanın nəticələri də bəllidir. Xalq parlamenti ələ keçirib, rəsmiləri şil-küt etdi və az qala vətəndaş müharibəsi başlayacaqdı. Deyəsən həmin revanşist qüvvələr o günlərin həsrətini yaşayırlar.

Heç olmasa, dünya hərb tarixində yaşanan müharibələrin yekunlarına və çıxarılan nəticələrə nəzər salsınlar. Məsələn, götürək yaxın tarixdə baş verənləri. Faşist Almaniyası müharibədə məğlub olduqdan sonra ideologiyadan imtina edərək tamam başqa bir xətt götürdü və bu gün də dünyanın ən qüdrətli dövlətlərindən birinə çevrilib. Ermənistan da yaxşı olardı ki, başqasının torpağına göz dikməsin, inteqrasiya və qonşularla sülh şəraitində yaşamağa çalışsın.

Kamran Seyidov
Milli.Az

 

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.