Azərbaycanın İndoneziya və Sinqapurdakı səfiri etimadnamələrini Sinqapur Prezidentinə təqdim edib

Azərbaycanın İndoneziyadakı səfirliyindən AzərTAc-a daxil olmuş məlumatda bildirilir ki, Azərbaycanın İndoneziya və Sinqapurdakı səfiri Tamerlan Qarayev Azərbaycan Prezidenti İlham Əliyev tərəfindən imzalanmış etimadnamələri Singapur Prezidenti Toni Tan Keng Yama təqdim etmişdir.

T.Qarayev bu ölkənin Prezidenti ilə söhbətində Azərbaycanın Singapur ilə münasibətlərin həm ikitərəfli, həm də çoxtərəfli çərçivədə inkişafına xüsusi əhəmiyyət verdiyini vurğulamışdır.

Sonra Ermənistan-Azərbaycan, Dağlığ Qarabağ münaqişəsi barədə söhbət açan səfir münaqişə nəticəsində Azərbaycan ərazilərinin 20 faizinin Ermənistan tərəfindən işğal olunduğunu və işğal nəticəsində Azərbaycanda 1 milyon məcburi köçkünün olduğunu bildirmişdir. Səfir T.Qarayev Azərbaycan xalqının tarixində ən qanlı səhifə olan Xocalı soyqırımının 20-ci il dönümünün hazırda Azərbaycanda, eləcə də dünyanın əksər ölkələrində anıldığını Sinqapur Prezidentinin diqqətinə çatdırmışdır. Soyqırımı haqqında geniş məlumatı dinləyən Sinqapur Prezidenti, bu hadisənin çox təəssüf doğurduğunu və belə cinayətləri törədənlərin ədalət mühakiməsi qarşısına çıxarılması vacibliyini vurğulayaraq Azərbaycan xalqına başsağlığı vermişdir.

Görüşün davamında Azərbaycan tərəfinin Sinqapur ilə qarşılıqlı sərmayə layihələrinin həyata keçirilməsində maraqlı olduğu qeyd edilmişdir.

Singapur Prezidenti iki dövlət arasında münasibətlərin inkişafından məmnunluğunu bildirmişdir. Sinqapur iqtisadiyyatının sürətlə inkişaf etdiyini və qlobal iqtisadiyyatın inkişafına dair səylərini vurğulayaraq ölkələrimiz arasında ikitərəfli iqtisadi əməkdaşlığın önəmli olduğunu qeyd etmişdir. Prezident Sinqapurun Azərbaycan ilə əməkdaşlığa böyük əhəmiyyət verdiyini bildirmiş və bu çərçivədə hökumətinə səfirlik ilə sıx əməkdaşlıq etməyi tövsiyə edəcəyini vurğulamışdır.

T.Qarayev ikitərəfli münasibətləri inkişafı üçün yüksək səviyyəli qarşılıqlı səfərlərin həyata keçirilməsinin və dövlətlər arasında hüquqi bazanın yaradılmasının vacibliyini qeyd etmişdir.

Sinqapur Prezidenti bu fikirlə razılaşmış və Azərbaycan Respublikasının Prezidenti İlham Əliyevin Sinqapura səfərinin hər zaman alqışlandığını vurğulamışdır. Həmçinin, Toni Tan Keng Yam hüquqi bazanın yaradılması üçün aidiyyəti nazirliklərə tapşırıq verəcəyini və qısa zamanda Azərbaycan tərəfinə layihələrin təqdim olunacağını vəd etmişdir.
 
Milli.Az