Rövşən Rüstəmov nazir müavini təyin olundu

Rövşən Rüstəmov nəqliyyat, rabitə və yüksək texnologiyalar nazirinin müavini təyin olunub.

Nazirlikdən Milli.Az-a verilən məlumata görə, o, bu vəzifəyə Azərbaycan Prezidentinin 2021-ci il 14 iyun tarixli Sərəncamı ilə təyin olunub. O, bu vəzifədə çalışan Elmir Vəlizadəni əvəz edib. Belə ki, Prezidentin digər Sərəncamı ilə Elmir Vəlizadə nəqliyyat, rabitə və yüksək texnologiyalar vəzifəsindən azad edilib.

Qeyd edək ki, R. Rüstəmov bu təyinata qədər "Azərkosmos" ASC-nin sədr müavini vəzifəsində çalışıb.

R.Rüstəmov 1980-ci ildə anadan olub.

1997-2001-ci ildə Azərbaycan Respublikası Prezidenti yanında Dövlət İdarəçilik Akademiyasında təhsil alaraq Dövlət və bələdiyyə idarəetməsi ixtisasını fərqlənmə diplomu ilə bitirərək bakalavr dərəcəsi alıb.

2001-2003-cü ildə Azərbaycan Respublikası Prezidenti yanında Dövlət İdarəçilik Akademiyasında təhsil alaraq İqtisadiyyatın hüquqi tənzimlənməsi ixtisasını fərqlənmə diplomu ilə bitirərək magistr dərəcəsi alıb.

2004-2007-ci ildə iqtisadiyyatın davamlı inkişaf problemləri mövzusunda dissertasiya müdafiə edib və iqtisadiyyat üzrə fəlsəfə doktoru elmi dərəcəsi alıb.

2004-2012-ci ildə "Azərpoçt" MMC-də Biznesin inkişafı şöbəsində müdir müavini, Əməliyyatlar şöbəsinin müdiri vəzifəsində çalışıb.

2012-2014-cü ildə "Azərkosmos" ASC-də Korporativ idarəetmə üzrə müşavir vəzifəsində çalışıb.

2014-cü ildə təhsilini Biznesin Davamlılığı İnstitutunda (the Business Continuity Institute) davam etdirərək "Biznesin davamlılığının planlaşdırılması proqramı"nı bitirmişdir. 2014-cü ildən etibarən Biznesin Davamlılığı İnstitutunun həqiqi üzvüdür.

Azərbaycan Respublikası Prezidentinin Sərəncamı ilə "Tərəqqi" medalı ilə təltif edilib.

2018-ci ildə Azərbaycan Respublikası Prezidentinin 2018-ci il 4 iyun tarixli Sərəncamı ilə "Azərkosmos" ASC-nin sədr müavini təyin edilib.

2021-ci ildə Azərbaycan Respublikası Prezidentinin 2021-ci il 14 iyun tarixli Sərəncamı ilə nəqliyyat, rabitə və yüksək texnologiyalar nazirinin müavini təyin edilib.

Milli.Az