İllərdir formalaşmış hərbi büdcə döyüş meydanında öz bəhrəsini verir - Hərbi ekspert

Azərbaycan Silahlı Qüvvələri hələ 2000-ci illərin əvvəlindən başlayaraq müdafiə vasitələrinin artırılmasında əsas diqqətini yeni silah və texnikaların alınmasına yönəltdi. Bu silah və texnikaların arasında əsas yeri məhz yüksək dəqiqliyə malik yeni döyüş vasitələri tutur.

Milli.Az bildirir ki, bunu Trend-ə açıqlamasında hərbi ekspert Rəşad Süleymanov deyib.

Onun sözlərinə görə, bunlar Pilotsuz Uçuş Aparatları, idarə olunan raket kompleksləri, operativ taktik raket kompleksi və ballistik raketləridir: "Gördüyünüz kimi, məhz bu gün Azərbaycan sentyabrın 27-dən başlayan döyüş əməliyyatlarında daha çox PUA-lardan və yüksək dəqiqliyə malik silahlardan istfadə edir. Hazırda biz ikinci Qarbağ müharibəsini yüksək texnologiyalar müharibəsi kimi adlandıra bilərik. Belə ki, bu gün yüksək dəqiqliyə malik silahlarla döyüşlər aparılır və həmin silahlardan məhz Azərbaycan ordusu istifadə edir.

Qarabağda müasir hərbi texnikaya sahib olan Azərbaycan ordusu ilə köhnə sovet texnikasına sahib Ermənistan ordusu arasında döyüşlər gedir. Məhz Azərbaycanın əldə etidiyi yeni silah və texnalogiyalar sayəsində qısa bir müddətdə düşmənin hərbi texnikası, minlərlə canlı qüvvəsi məhv edilir. Belə demək mümkünsə, müasir döyüş texnikasında Azərbaycan standartları yaranır".

Hərbi ekspert qeyd edib ki, zenit raket komplekləri adətən hava hucumundan müdafiə üçün nəzərdə tutulub, ancaq bu gün Qarabağda gedən döyüşlərdə hər şey əksinədir: "Bu, tarixi hadisədir. Azərbaycan ordusu PUA-larla perfomans göstərərək düşmənin məhz hava hücumundan müdafiə üçün, xüsusən də pilotsuz uçuş aparatlarının məhvi üçün nəzərdə tutulan zenit raket komplekslərini, S-300 kimi dünya brendini məhv edir. Onu da əlavə edim ki, Azərbaycanda PUA-lardan şəbəkələşmiş bir formada istidadə olunur. Çünki iş tək müasir texnologiyalara sahib olmaqdan ibarət deyil, bu texnikaları istifadə edəcək şəxslər də lazımdır. Ona görə də Azərbaycan bu beyinlərin hazırlanması ilə də məşğuldur".

Rəşad Süleymanov əlavə edib ki, yeni texnologiyalar döyüş xərclərinin minimallaşmasına da şərait yaradır: "PUA-ların köməyi ilə hədəfə yalnız bir dəfə zərbə endirilir. Bir hədəfə 10 mərmi deyil, bir mərmi atılır. Biz bunu Müdafiə Nazirliyinin yaydığı görüntülərdən də görə bilərik. Eləcə də yüksək texnologiyalara malik döyüş texnikaları dedikdə tək PUA-ları deyil, müşahidə və idarə olunan raket sistemlərini göstərmək olar. Bu müharibə onu göstərdi ki, Azərbaycanın illərdir hərbi sahəyə ayırdığı vəsait boş yerə xərclənməyib. Ordumuz Ali Baş Komandanın da qeyd etdiyi kimi, "maksimum nəticə, minimum itki" prinsipinə əsaslanır".

Milli.Az