Siyasət

İsrail Bakıda Tel-Əviv-Ankara görüşünün təşkilinə görə Prezident İlham Əliyevə təşəkkür edib

10 Aprel 2025 16:49

Baxış: 809

İsrail Bakıda Tel-Əviv və Ankaranın nümayəndələrinin görüşünün təşkilinə görə Prezident İlham Əliyevə təşəkkür edib.

Trend xəbər verir ki, bu barədə İsrailin baş naziri Benyamin Netanyahunun mətbuat xidmətinin "X" səhifəsindəki paylaşımında deyilir.

"Baş nazir Benyamin Netanyahunun göstərişi ilə dünən Milli Təhlükəsizlik Şurasının rəhbəri Tzaçi Haneqbinin başçılıq etdiyi hərbi-siyasi nümayəndə heyəti, o cümlədən Müdafiə Nazirliyi və təhlükəsizlik qüvvələrinin nümayəndələri ilə onların türkiyəli həmkarları arasında görüş keçirilib. İsrail mühüm danışıqlara ev sahibliyi etdiyinə görə Azərbaycana və Prezident İlham Əliyevə təşəkkür edir. Hər bir tərəf regionda öz maraqlarını təqdim etdi. Regional sabitliyi qorumaq üçün dialoq yolunda davam etmək razılaşdırılıb", - deyə paylaşımda deyilir.

Qeyd edək ki, ötən gün Bakıda Türkiyə və İsrail nümayəndələri arasında görüş keçirilib. Görüşdə Türkiyə və İsrail nümayəndə heyətləri Suriyada münaqişəsizlik mexanizminin yaradılmasını müzakirə ediblər.

Milli.Az