Siyasət

Humanitar yardımın ehtiyacı olan əhaliyə ayrılması nəzərdə tutulub - Ayxan Hacızadə

30 Dekabr 2024 10:43

Baxış: 1 209

#SURİYA #XARİCİ İŞLƏR NAZİRLİYİ

Azərbaycanın göndərdiyi humanitar yardımın İdlibdə ehtiyacı olan əhaliyə ayrılması nəzərdə tutulub.

Milli.Az xəbər verir ki, bunu Abşeron Logistika Mərkəzində Azərbaycandan Suriyaya ilk humanitar yardım karvanının göndərilməsi zamanı jurnalistlərə açıqlamasında Xarici İşlər Nazirliyinin mətbuat katibi Ayxan Hacızadə deyib.

"Azərbaycan Respublikasının Prezidentinin göstərişinə müvafiq olaraq Suriyada humanitar vəziyyətdən əziyyət çəkən əhaliyə yardım məqsədilə Azərbaycan Respublikasının hökumətinin adından Suriya Ərəb Respublikasına müvafiq humanitar yardım konvoyunun göndərilməsi nəzərdə tutulub. Bu konvoy ümumilikdə 200 tona yaxın qida və ərzaq məhsullarını əhətə edir. Konvoyun Azərbaycan Respublikası, Gürcüstan və Türkiyə üzərindən keçməklə Çobanbəy keçid məntəqəsində Suriyaya və Suriya üzərindən İdlib şəhərinə çatdırılması nəzərdə tutulub. Bu yardımın Türkiyənin AFAD təşkilatı vasitəsilə Suriyanın İdlib şəhərində ehtiyacı olan əhaliyə ayrılması nəzərdə tutulub", - o bildirib.

Onun sözlərinə görə, Azərbaycan XİN müavininin rəhbərlik etdiyi nümayəndə heyəti Suriyada səfərdədir.

"Onlar keçid hökuməti və XİN ilə müvafiq görüş keçiriblər, Suriya ilə Azərbaycan arasında müvafiq əməkdaşlıq məsələlərini müzakirə ediblər. Bildiyiniz kimi, 2012-ci ildən etibarən Suriyada Azərbaycan səfirliyi fəaliyyət göstərmir. Səfiliyin fəaliyyətinin bərpası məsələsi də bu görüşlərin müzakirə mövzusu olub", - A.Hacızadə bildirib.

Milli.Az