Seçkilərdə “rəngli” müşahidəçilər: onların məqsədi nədir?

Azərbaycan Milli Məclisinə növbədənkənar seçkilərin keçirilməsinə cəmi üç gün qalır və ölkənin hər bir künc-bucağında hazırlıq işləri sürətlə davam edir. Bu seçkilərin ölkənin gələcəyi üçün əhəmiyyətli olacağı gözlənilir, lakin bu seçkiləri müşahidə edəcək beynəlxalq qurumlar arasında müəyyən şübhələr və narahatlıqlar da var.

Növbədənkənar seçkilər zamanı beynəlxalq müşahidəçilərin olması artıq adi hal alıb və bu dəfə də ATƏT-in Demokratik Təsisatlar və İnsan Haqları Bürosu (DTİHB), ATƏT Parlament Assambleyası, MDB Parlament Assambleyası, Şanxay Əməkdaşlıq Təşkilatı, Türk Dövlətləri Təşkilatı və digər ölkə və parlamentlərin müşahidə missiyaları Azərbaycana gələcək. Bu müşahidəçilərin əsas vəzifəsi, nəzəri olaraq, seçki prosesinə obyektiv və ədalətli nəzarət etməkdir. Ancaq sual yaranır: bu müşahidəçilər öz missiyalarını düzgün icra edəcəklərmi, yoxsa seçkilərə gizli niyyətlərlə yanaşacaqlar?

Bu suala cavab axtararkən, əvvəlki təcrübələrə nəzər salmaq vacibdir. Xatırlayırsınızsa, 2024-cü ilin fevralında keçirilmiş növbədənkənar prezident seçkilərində də ATƏT fəal LGBT üzvləri ilə təmsil olunmuşdu. Bu müşahidəçilər seçki prosesi zamanı təkcə siyasi nəzarətçi kimi çıxış etmirdilər, eyni zamanda Qərbin ideoloji dəyərlərini yaymaq üçün bir vasitə kimi də istifadə olunurdular. Bu vəziyyət parlament seçkilərində də təkrarlanacaq kimi görünür.

Qərbin "LGBT+İQ", "NOwar", "Noracism" kimi şüarlarla örtülmüş ideologiyası heç kimə sirr deyil. Bu şüarlar altında gizlənən niyyətlər, xüsusilə də Azərbaycanda, bəzən açıq şəkildə, bəzən isə dolayısıyla cəmiyyətə təlqin edilməyə çalışılır. Qərb fondları tərəfindən dəstəklənən bu müşahidəçilər, əlində göyqurşağı rəngli bayraq tutan kosmopolitan fəallar, Azərbaycan cəmiyyətində öz ideyalarını yaymağa çalışırlar. Bu müşahidəçilərin əsl missiyası isə seçki prosesinə obyektiv nəzarət etmək deyil, əksinə, Qərbin müəyyən dəyərlərini yaymaq və siyasi manipulyasiya etməkdir.

Təəssüf ki, ATƏT-in bu müşahidə missiyalarında iştirak edən bəzi LGBT dəstəkçiləri, Azərbaycana gəldikdən dərhal sonra ölkəmizin daxilində sosial təzyiqlərə dair məlumatlar toplamağa başlayırlar. Bu məlumatlar əsasında hazırlanan hesabatlar isə, sanki əvvəlcədən yazılmış bir ssenariyə əsaslanır. Məlumatlar göstərir ki, hələ keçirilməmiş seçkilərlə bağlı ATƏT-in müşahidə missiyasının hesabatı artıq hazırdır və burada Azərbaycana qarşı ciddi iradlar irəli sürülür. Xüsusilə, cəmiyyətdə LGBT və feministlərə qarşı "dözümsüzlük" və "təzyiq"lərin olduğu iddia edilir. Bu isə Azərbaycanda seçki prosesinin obyektiv müşahidəsinə ciddi kölgə salır.

LGBT və feminist hərəkatlarına qarşı olan bu "təzyiqlər" haqqında iddialar isə, əslində, Qərbin Azərbaycana təzyiq göstərməyə çalışdığı bir mexanizm kimi görünür. Bu müşahidəçilərin sosial şəbəkələrdəki paylaşımlarına baxsaq, onların siyasi kimliklərini necə vurğuladıqlarını görə bilərik. Bu isə onların obyektivliyini şübhə altına alır. Azərbaycana gələn bu qonaqların əsas missiyasının nə olduğu aydın deyil, lakin görünən odur ki, onlar seçki müşahidəçisi olmaqdan çox, siyasi ideologiyanı yaymaq üçün buradadırlar.

Beləliklə, bu seçkilər həm Azərbaycanda siyasi proseslərin gedişatına təsir edəcək, həm də beynəlxalq miqyasda ölkənin imicinə əhəmiyyətli təsir göstərəcək. Ancaq əsl sual budur: bu müşahidəçilər Azərbaycanın daxili işlərinə qarışaraq, ölkənin suverenliyinə zərbə vurmağa çalışacaqmı? Bu suala cavab axtararkən, Azərbaycanın milli maraqlarını müdafiə etmək və hər hansı xarici təsirə qarşı ayıq-sayıq olmaq vacibdir. Seçkilərin nəticəsi yalnız Azərbaycan xalqının iradəsinə əsaslanmalıdır, və heç bir xarici müşahidəçi bu prosesə mənfi təsir göstərə bilməməlidir.

Milli.Az