Coğrafiyanı bilməyən qız necə nazir oldu?

Yaxın Şərqdəki müsəlman qırğınına göz yuman ABŞ Cənubi Qafqazla bağlı proseslərə qarışmayan kimi görünsə də əslində müxtəlif yollarla vəziyyəti nəzarətdə saxlamağa çalışır. ABŞ bu işdə USAİD kimi "xeyriyyə" təşkilatı ilə yanaşı Kanada kimi ölkədən də istifadə edir. Kanadanın Aİ-nin Ermənistandakı missiyasına qoşulması bunu deməyə əsas verir. Aydın məsələdir ki, ABŞ missiya daxilinə öz "vassalını" yerləşdirməyə çalışır.

"Vassal" sözü burada təəccüb doğurmamalıdır. Çünki, Kanada Vaşinqtondan gələn göstərişləri qeyd-şərtsiz icra etməklə məşğul olan, yarandığı gündən indiyədək xarici siyasətdə "maşa" rolunu oynayan bir dövlətdir. Bu ölkə sanki ABŞ-nin bir ştatıdır. Hətta, ştat qubernatorlarının Kanada hökumətindən daha çox səlahiyyəti var.

Məlum olduğu kimi, Kanada xarici işlər naziri Melani Coli Ermənistana gedib. O, Azərbaycanı "deportasiya"da ittiham edib və Bakını sanksiyalarla hədələyib. Bir müddət əvvəl Ermənistanın Azərbaycanla sərhəddə döyüş mövqeyinə gələrək binoklla Azərbaycanı müşahidə etməsi ilə özünün diplomatik davranış və normalardan nə qədər uzaq olduğunu göstərən Colinin ölkəmizə qarşı iddialar səsləndirməsi qeyri-adi hal deyil. Bu birbaşa Azərbaycana qarşı qərəzin göstəricisidir.

Azərbaycana qarşı nifrət qusan nazir bu ölkənin Kanada iqtisadiyyatı, hərbi sənayesi üçün əhəmiyyətli olduğunu, uran məsələsində bizdən asılı olduğunu nəzərə almır. Ya da ola bilsin ki, onun xəritə biliyi çox zəifdir və Azərbaycanın hansı vacib coğrafi məkanda yerləşdiyini bilmir. Belə ki, bu gün Kanada özünün uran ehtiyacını Mərkəzi Asiya ölkələri vasitəsilə təmin edir. Uran hava yolu ilə daşınmadığı üçün onu ya Çin, ya Azərbaycan üzərindən Kanadaya aparmaq mümkündür. Çinin buna razılıq verməsi mümkün olmadığından Kanada bu məsələdə Azərbaycandan asılıdır. Kanada Azərbaycanla təhdid dilində danışanda bu asılılığı nəzərə alsa yaxşı olar. Çünki, Azərbaycanın istənilən vaxt bu ixracı dayandıra bilməsi Kanada üçün yaxşı nəsə vəd etmir. 

Prosesləri tam izləməyərək açıqlama verən Kanada kimi regiondan uzaq və proseslərdən bixəbər ölkələrin məsələyə müdaxiləsi bölgədə sabitliyin pozulması məqsədi daşıyır. Bu ölkənin Azərbaycanı sanksiyalarla hədələməsi ABŞ-nin dolayı yolla Azərbaycana növbəti təzyiq etmə cəhdidir. Məlum məsələdir ki, ABŞ Cənubi Qafqazda vəziyyətin daha da gərginləşməsinə çalışır. Onlar bu kimi yollarla sülh prosesinin imzalanması prosesinin uzanmasına şərait yaradırlar. Ermənistan xarici işlər naziri də sülh prosesinin irəliləyişi üçün yaranmış fürsəti dəyərləndirmək əvəzinə belə oyunlara alət olur.

Bəxtiyar Umarlı
Milli.Az