Siyasət

Ermənisayağı paradoks: “Qərbpərəst” İrəvan Rusiyanın müttəfiqləri arasında ilk 3-lükdədir

15 Mart 2023 22:34

Baxış: 1 539

#ERMƏNİSTAN

Ənənəvi olaraq həmişə eyni anda iki kresloda oturmağa çalışan Ermənistan son vaxtlar özünü əsasən qərbyönlü kimi göstərməyə çalışır, baxmayaraq ki, bu yaxınlarda "The Economist" jurnalının dərc etdiyi Rusiya müttəfiqləri indeksi bunun əksini göstərir.

Belə ki, bu reytinqdə Ermənistan 9 xalla şərəfli ikinci yeri tutur, 11 xal toplayan Belarusdan sonra ikincidir. İlk üçlüyü Qırğızıstan qapayır (8 xal).

Milli.Az Trend-ə istinadən bildirir ki, reytinq üç istiqamət üzrə 11 dəstək göstəricisi əsasında hazırlanıb: diplomatik sahə, hərbi sahə və iqtisadi, o cümlədən enerji sektoru.

Qeyd edilib ki, ən yüksək bal toplayan ölkələr Rusiya ilə əsasən siyasət, tarix və coğrafiya ilə bağlıdır, məsələn, Ermənistan, Belarus, İran və Qırğızıstan.

Xüsusilə "The Economist"in məqaləsində vurğulanıb ki, Ermənistan 2020-ci ildə Azərbaycanla müharibə zamanı onun ərazisindəki 3500 rus əsgərinin ona köməyə gəlməməsindən hiddətlənib:

"Ermənistan bu il KTMT-nin hərbi təliminə ev sahibliyi etməkdən imtina etdi və indi Azərbaycanla sərhəddə vəziyyətə nəzarət etmək üçün Aİ missiyasını dəvət etməklə siyasi havadarlara gəldikdə, görünür, bunu özünü sığortalayır".

Reytinqin tərtib edilməsində CEIC Data, CSIS, Global Trade Tracker, IEA, IISS, IMF, Lowy Institute, Nature, Silverado Policy Accelerator, SIPRI, BMT, UN Comtrade kimi tanınmış agentliklər, beyin mərkəzləri və təşkilatlar iştirak edib.

Aydın görünür ki, Ermənistan yenə də ənənəsinə sadiq qalaraq, sonda özünün də ikiüzlü siyasətin qurbanına çevriləcəyini dərk etmədən yenə də ikili oyun oynayır.

Milli.Az