Siyasət

Almaniya ilə Azərbaycan arasında münbit siyasi və iqtisadi əməkdaşlıq mövcuddur - Elşad Həsənov

15 Mart 2023 19:31
Baxış: 789

Almaniya ilə Azərbaycan arasında münbit siyasi və iqtisadi əməkdaşlıq mövcuddur. Prezident İlham Əliyevin Almaniyaya işgüzar səfəri münasibətlərin daha da inkişaf etdirilməsinə imkan verəcək.

Bunu Trend-ə açıqlamasında politoloq Elşad Həsənov bildirib.

O qeyd edib ki, Almaniya Avropada Azərbaycanın ən vacib iqtisadi tərəfdaşlarından biridir. Azərbaycan isə Almaniyanın Cənubi Qafqazda ən mühüm iqtisadi tərəfdaşıdır.

"Azərbaycanla Almaniyanın iş birliyi XIX əsrin ikinci yarısından başlayır. 1863-cü ildə Almaniyanın "Simens qardaşları" firması tərəfindən Gədəbəy ərazisində yerləşən mis yataqları bazasında iri misəritmə zavodları tikilib. Bundan əlavə, "Simens qardaşları" firması Daşkəsən ərazisində kobalt yataqları bazasında kobalt zavodu inşa edib. Bu zavodların inşası nəticəsində xeyli sayda insan işlə təmin edilib, əhalinin maddi rifahı yüksəlib", - deyə E.Həsənov bildirib.

O qeyd edib ki, Almaniya Azərbaycanın müstəqilliyini 1992-ci ilin 12 yanvarında tanıyıb. "Azərbaycan ilə Almaniya arasında diplomatik münasibətlər 1992-ci ilin 20 fevralında qurulub. 2 sentyabr 1992-ci ildə Azərbaycanın Almaniyada səfirliyi, 22 sentyabr 1992-ci ildə Almaniyanın Azərbaycanda səfirliyi açılıb. Diplomatik münasibətlərin yaranmasından sonra Azərbaycan və Almaniya arasında əlaqələr mütəmadi olaraq inkişaf edib", - deyə E.Həsənov bildirib.

O qeyd edib ki, Almaniya dünyanın ən iri iqtisadiyyatına malik olan ölkələrindən biridir, Avropanın lider ölkəsidir.

"Almaniya iqtisadiyyatında xüsusi avtomobil istehsalı, kimya sənayesi, hərbi sənaye və digər sahələr çox inkişaf edib. Azərbaycanla Almaniya arasında iqtisadi göstəricilər ildən- ilə artır. Azərbaycanda çoxlu sayda Almaniya şirkəti fəaliyyət göstərir. Prezident İlham Əliyevin Almaniyaya səfəri əməkdaşlığın inkişafında yeni bir səhifə açacaq", - deyə o qeyd edib.

Milli.Az

 

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.