Kartof qızardarkən yağ çəkməməsi üçün nə etməli?

Kartof qızardarkən yağ çəkməməsi üçün düzgün hazırlıq və bişirmə texnikası olduqca önəmlidir. Kartofun tərkibindəki nişastanı azaltmaq üçün onları yumaq və yaxşıca qurulamaq qızartmanın keyfiyyətini nəzərəçarpacaq dərəcədə artırır. Yağın kifayət qədər isti olması kartofun xarici səthinin sürətlə "möhürlənməsini" təmin edərək yağın içəri hopmasının qarşısını alır.

Milli.Az xırtıldayan və yüngül kartof qızartmasının sirlərini təqdim edir:

Kartofun növü onun nə qədər yağ çəkəcəyinə birbaşa təsir edir. Nişastası çox olan kartoflar adətən daha çox yağ çəkir. Qızartma üçün sərt və sarı kartoflara üstünlük verilməlidir. Bu növ kartofların tərkibində su az olur, nəticədə daha xırtıldayan alınır. Köhnə və yumşalmış kartoflardan qaçın, çünki onlar yağı süngər kimi canına çəkir.

Kartofları doğradıqdan sonra artıq nişastadan təmizlənməsi üçün bol suda yumaq lazımdır. Yuduqdan sonra isə kartofların tamamilə quru olması şərtdir. Nəm kartof yağa atıldıqda həm yağ sıçrayır, həm də kartof daha çox yağ çəkir. Kağız dəsmal və ya təmiz mətbəx dəsmalı ilə hər bir dilimi yaxşıca qurulayın.

Kartofların bərabər və nazik kəsilməsi onların eyni vaxtda və düzgün bişməsini təmin edir. Qalın kəsilmiş kartofların içi gec bişdiyi üçün onlar yağda daha çox qalır və nəticədə daha çox yağ hopdurur. Eyni ölçülü dilimlər yağda qalma müddətini minimuma endirir.

Ən çox edilən səhv kartofu soyuq yağa atmaqdır. Soyuq yağa atılan kartof yağı dərhal canına çəkir və ağırlaşır. İdeal qızartma temperaturu 170-180 dərəcə arasındadır. Yağ kifayət qədər qızdıqdan sonra kartofları əlavə etmək lazımdır. Lakin diqqətli olun: yağ həddindən artıq isti olarsa, kartofun üzü yanar, içi isə çiy qalar.

Doğranmış kartofları bir müddət soyuq suda (hətta buzlu suda) saxlamaq nişastanın tamamilə ayrılmasına kömək edir. Suda dincələn kartoflar daha az yağ çəkir. Lakin sudan çıxardıqdan sonra yuxarıda qeyd etdiyimiz kimi mütləq qurulanmalıdır.

Qızartma prosesi bitən kimi kartofları tavadandan çıxarıb birbaşa kağız dəsmalın üzərinə qoyun. Kağız dəsmal səthdəki artıq yağı özünə çəkərək yeməyi yüngülləşdirir. Kartofları üst-üstə yığmayın, əks halda öz buxarları ilə yumşalarlar.

Bəzi aşpazlar kartofları yağa atmadan əvvəl onları çox az miqdarda sirkəli suda saxlamağı tövsiyə edir. Bu, kartofun xarici qatının daha bərk və xırtıldayan olmasına kömək edir.

Lalə Qüdrətova
Milli.Az