Tam ölçülü yumşaq bulka xəmiri resepti

Bu resept həm asan yoğrulan, həm də bişdikdən sonra uzun müddət yumşaq qalması ilə səhər yeməkləri və çay saatları üçün ideal seçimdir.

Milli.Az lazım olan ərzaqları təqdim edir:

1 stəkan ilıq süd

1 stəkan ilıq su

1 stəkan duru yağ (günəbaxan)

2 xörək qaşığı şəkər tozu

1 çay qaşığı duz

1 paket instant maya (və ya yarım paket yaş maya)

1 ədəd yumurta (sarısını üzəri üçün ayırın)

5 - 5,5 stəkan un (tədricən əlavə edilməli)

Hazırlanma Qaydası
Yoğurma qabına ilıq südü, ilıq suyu, duru yağı, şəkər tozunu və mayanı əlavə edib qarışdırın. (Mayanın aktivləşməsi üçün bir neçə dəqiqə gözləyə bilərsiniz).

Üzərinə yumurta ağını və duzu əlavə edərək qarışdırmağa davam edin.

Unu nəzarətli şəkildə az-az əlavə edin. Ələ yapışmayan, lakin çox yumşaq bir xəmir əldə edənə qədər yoğurun.

Xəmirin üzərini örtün və isti bir yerdə təxminən 40 dəqiqə mayalanmağa qoyun.

Mayalanan xəmirdən naringi böyüklüyündə parçalar qopardın. İstədiyiniz içliyi (pendir, kartof və s.) qoyaraq forma verin.

Bulkaları yağlı kağız sərilmiş soba listinə düzün. Üzərinə ayırdığınız yumurta sarısını çəkin, küncüt və ya qara zirə səpin.

Əvvəlcədən 180°C qızdırılmış sobada üzəri qızarana qədər (təxminən 20-25 dəqiqə) bişirin.

Mayanın sirri: Süd və su mütləq ilıq olmalıdır. Çox isti olsa mayanı "yandırar", soyuq olsa xəmir gec gələr.

Unun miqdarı: Unu birdən tökməyin. Xəmiriniz nə qədər yumşaq olarsa, bişəndən sonra da bir o qədər pambıq kimi olar.

Sini mayası: Bulkaları formaya salıb siniyə düzdükdən sonra sobaya qoymazdan əvvəl 10-15 dəqiqə təpçidə gözlətsəniz, daha yaxşı qabararlar.

Süd yoxdursa eyni miqdarda qatıqdan istifadə edə bilərsiniz (bu, xəmirə yüngül nəmlik verər).

Daha ətirli olmasını istəyirsinizsə, duru yağın bir hissəsini əridilmiş kərə yağı ilə əvəz edin.

Şəkər yerinə mayalanmanı sürətləndirmək və fərqli dad vermək üçün 1 xörək qaşığı bal da əlavə etmək olar.

Lalə Qüdrətova
Milli.Az