Maraqlı

Mütəxəssis: "Payız-qış aylarında qripə qarşı peyvəndlərin böyük əhəmiyyəti var"

24 Oktyabr 2020 22:15
Baxış: 1 054
VTB-də MİNİMAL FAİZ DƏRƏCƏSİ İLƏ NAĞD KREDİT 10.49%-dən

Son günlər havaların soyuması ilə respirator xəstəliklərin də artması müşahidə olunur. Payız fəslinin gəlişi ilə qripə yoluxanların sayı artır.

Milli.Az e-tibb.az-a istinadən bildirir ki, bunu Mərkəzi Gömrük Hospitalının ümumi cərrahı, tibb üzrə fəlsəfə doktoru Namq Novruzov bildirib:"Unutmaq lazım deyil ki, pandemiya davam edir və son 3-4 günün məlumatları təhlükənin sovuşmadığını, əksinə, daha da artdığını deməyə əsas verir. Bəs belə olan halda özümüzü necə qoruyaq?

Bir həkim kimi demək istərdim ki, mütləq ictimai yerlərdə, qapalı məkanlarda ara məsafə saxlamaq, tibbi maskalardan düzgün istifadə etmək, əlləri tez-tez sabunla yumaq və ya spirtlə silmək, zəruri olmadıqda evdən çıxmamaq vacib şərtlər olaraq qalır. Özünüzdə hərarətin qalxması, öskürək, boğazda qıcıqlanma, ağrı hiss etdikdə həkimə müraciət edin, boğulma anını gözləməyin, sonra müalicə almaq mümkün olmaya bilər".

Mütəxəssis uşaqları da bu virusdan qorumağı tövsiyə edib: "Əvvəllər uşaqların bu virusa yoluxmaması barədə danışırdıqsa, hazırda onların da koronavirusa yoluxması barədə faktlar var. Çalışın uşaqların və özünüzün immunitetini möhkəmləndirən qidalar qəbul edəsiniz. Vitamin və minerallarla zəngin məhsullar immuniteti möhkəmləndirir. Açıq havada çox gəzin, amma bu zaman tibbi maska və ara məsafə saxlamağı da unutmayın. Beləliklə, özünüzü və sevdiklərini koronavirusdan qorumuş olarsınız. Payız-qış aylarında qripə qarşı peyvəndlərin də çox böyük əhəmiyyəti var. Məlumdur ki, koronavirusa qarşı vaksin hələ yoxdur. Ona görə də, adi qripə qarşı peyvəndlərin vurulması müsbət təsir göstərir.

Çətin və məsuliyyətli, bununla belə zəfər dolu, qələbə dolu xoşbəxt günlər yaşayırıq. Müzəffər ordumuz hər gün bizi yeni qələbələri ilə sevindirir. Eyni zamanda yaralı əsgərlərimizi də unutmayın. Onlara da həkimlərin yardımı lazımdır. Həkimlərimizə cəbhədən qayıdan yaralı əsgərlərimizin daha çox ehtiyacı var. Özünüzü, ətrafınızda olan insanları koronavirusdan qorumaqla, ordumuzun igid əsgər və zabitlərinə də kömək etmiş olarıq. Hər iki cəbhdə qələbə bizimlə olacaq!"

Milli.Az

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.