Maraqlı

“Apple” ən bahalı brend olaraq qalır

22 Oktyabr 2019 07:31
0 Şərh     Baxış: 312

Əqli mülkiyyətin qiymətləndirilməsində ixtisaslaşan "Interbrand" beynəlxalq konsaltinq şirkəti dünyanın ən bahalı brendlərinin növbəti illik reytinqini dərc edib. 1998-ci ildən tərtib olunan reytinqdə "Apple" şirkəti ardıcıl yeddinci dəfə birinci yeri tutub.

Milli.Az ictnews.az-a istinadən bildirir ki, 2019-cu ildə "Apple" brendinin dəyəri 234,2 milyard dollar təşkil edib ki, bu da bir il əvvəldən 9 faiz çoxdur. "Google" şirkəti 167,7 milyard dollarlıq göstərici ilə ikinci pillədə qərarlaşıb. Bu göstərici 2018-ci ilin nəticəsini 8 faiz üstələyir.

Liderlər üçlüyünü il ərzində 24 faiz bahalaşaraq 125,3 milyard dollar olan "Amazon" brendi tamamlayıb. Sonrakı mövqelərdə "Coca-Cola" (brendin qiyməti 4 faiz - 63,4 milyard dollaradək ucuzlaşıb), "Samsung" (2 faiz - 61,1 milyard dollaradək artım), "Toyota" (5 faiz - 6,2 milyard dollaradək artım) və "Mercedes-Benz" (5 faiz - 50,8 milyard dollaradək artım) yer alıb.

Tədqiqat aparılan zaman "Interbrand" tərəfindən brendin dəyərinə təsir göstərən müxtəlif amillər nəzərə alınır. Onlar arasında məhsul və xidmətlərin satışı üzrə maliyyə göstəriciləri, əmtəə nişanının alıcı seçiminə təsir dərəcəsi və şirkətin gəlirlərinə ziyan vurmadan yüksək qiymətlər təyin etməyə imkan verən brendin gücü qeyd olunur.

"Interbrand" reytinqinə ilk dəfə "Dell Technologies" (63-cü yer), "LinkedIn" (98-ci yer) və "Uber" (87-ci yer) kimi texnoloji şirkətlər daxil edilib. Qeyd etmək lazımdır ki, məlumat sızması ilə əlaqədar qalmaqallar və sonradan tətbiq edilən böyük məbləğli cərimələr nəticəsində "Facebook" sosial şəbəkəsinin brendinin dəyəri 12 faiz ucuzlaşıb.

Ən sürətli artan brendlər kimi "Mastercard" ( 25 faiz) və "Salesforce" ( 24 faiz) göstərilib. 2019-cu ildə "Gucci" ( 23 faiz), "Starbucks" ( 23 faiz) və "Adobe" ( 20 faiz) brendləri də artım tempini yüksəldib.

Reytinq müəlliflərinin sözlərinə görə, son ildə ən dinamik sektor internet vasitəsilə mediakontentin istehsalı və yayılması ilə bağlı sektor olub. Texnoloji sahədə brendlərin dəyəri orta hesabla 9 faiz bahalaşıb ki, bu da məşhur məhsul istehsalçılarından ( 11 faiz) azdır.

Bu il 100 ən bahalı brendin ümumi dəyəri 2,13 milyard dollar təşkil edib ki, bu da 2018-ci ilə nisbətdə 5,7 faiz çoxdur. 26 şirkət illik hesablamada ikirəqəmli artım tempi nümayiş etdirib, "IBM" və "Intel" isə tənəzzülə uğrayıb.

Milli.Az

loading...

Şərh yaz:

0 Şərh:

XƏBƏR LENTİ

Copyright © 2015 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.