Evdə kağız dəsmal istifadə edərkən bir daha düşünün

Təmizlik mütəxəssisləri mətbəx kağızlarının bəzi ev əşyalarında qalıcı cızıqlara və çöküntülərə yol açdığı barədə xəbərdarlıq edərək alternativ üsulları açıqlayıblar.

Milli.Az xəbər verir ki, ev təmizliyində praktik olduğu üçün tez-tez üstünlük verilən mətbəx kağızları, sərt lifli quruluşları və aşağı davamlılıqları səbəbindən müəyyən səthlərdə deformasiyaya səbəb olur.

Təmizlik mütəxəssisləri kağız dəsmal istifadəsindən qaçınılmalı olan 5 əsas məqamı və istifadə edilməli olan doğru materialları sıralayıblar.

Şüşə və güzgü səthlərdə kağız dəsmal istifadəsi sellüloza liflərinin parçalanması nəticəsində səthdə kiçik hissəciklər və izlər qoyur. Cessika İnqliş vurğulayıb ki, bu səthlərdə qüsursuz görüntü əldə etmək üçün kağız dəsmal yerinə yüksək keyfiyyətli mikrofiber bezlərə üstünlük verilməlidir.

Televizor və kompüter ekranları barmaq izlərini təmizləmək məqsədilə tez-tez silinsə də, bu cihazların malik olduğu xüsusi örtüklər kağız dəsmalın aşındırıcı təsirinə qarşı dözümsüzdür. Kristi Lord kağız dəsmalların bu həssas səthləri cıza biləcəyini qeyd edərək, yalnız yumşaq mikrofiber bezlərin istifadəsini tövsiyə edib.

Cilalanmış taxta səthlərdə kağız dəsmaldan istifadə liflərin lak təbəqəsində mikroskopik cızıqlar yaratmasına səbəb olur. Sprey təmizləyicilərlə birləşdikdə kağız dəsmalların səthdə qeyri-bərabər qalıqlar qoyduğu və taxtanın təbii parlaqlığını itirməsinə yol açdığı müəyyən edilib.

Paslanmaz polad məişət cihazları kağız dəsmalın liflərini özünə çəkir, nəticədə səthdə çöküntü yığılmasına və kiçik cızıqlara zəmin yaradır. Mütəxəssislər bu növ metal səthlər üçün xüsusi polad təmizləyicilərin və ya durulaşdırılmış qab yuyan maye ilə birlikdə yumşaq bezlərin istifadəsini məsləhət görürlər.

Çuqun tavaların təmizliyində kağız dəsmal istifadə etmək nahamar səth səbəbindən kağızın parçalanmasına və yeməklərə qarışa biləcək kiçik kağız qalıqlarının yaranmasına yol açır. Tavaların tam təmizlənməsi üçün sərt fırçalar və ya aşındırıcı süngərlər, qurutma prosesi üçün isə tük buraxmayan normal bezlərin istifadə edilməli olduğu bildirilib.

Lalə Qüdrətova
Milli.Az