Niyə soyuducuya kağız dəsmallar qoymaq lazımdır? - SƏBƏB

Təzə tərəvəzlər, meyvələr və göyərti çox tez xarab olur, əgər onları vaxtında istifadə etməsəniz. Bu səbəbdən də, kifayət qədər baha başa gələn bu məhsulları bəzən atmaq məcburiyyətində qalırıq. Lakin təcrübəli evdar qadınlar bu problemi kağız dəsmalların köməyi ilə həll ediblər.

Milli.Az lent.az-a istinadən bu mövzu ilə bağlı maraqlı məlumatları təqdim edir:

Adətən kağız dəsmallardan əlləri və ya mətbəx səthlərini silmək üçün istifadə olunur. Amma məlum olub ki, soyuducuda da onların çox faydası var. Kağız dəsmallar tərəvəzlərin təzə qalma müddətini əhəmiyyətli dərəcədə uzadır. Bu üsul xüsusilə yay mövsümündə, çoxlu salat, meyvə və tərəvəzin olduğu dövrdə daha faydalıdır - çünki bu məhsulları uzun müddət saxlamaq həmişə mümkün olmur. Kağız dəsmallar məhsulların təravətini qorumaqda əhəmiyyətli rol oynayır.

Tərəvəz, salat və meyvələrin təzə qalması üçün kağız dəsmallardan necə istifadə etməli?

Kağız dəsmal rulonundan bir neçə vərəq qoparın. Onları soyuducunun tərəvəz bölməsinin altına sərib üstünə tərəvəz, meyvə və ya göyərti düzün. Bu zaman məhsullardan ayrılan nəmlik kağız dəsmallara hopacaq, beləliklə nə çürümə, nə də pis qoxu yaranacaq Hər dəfə yeni tərəvəz və göyərti əlavə etdikdə, köhnə dəsmalları dəyişməyi unutmayın - bu, tərəvəz bölməsində təmizlik və təravəti qorumağa kömək edəcək. Əgər sizdə ispanaq və ya digər yarpaqlı göyərtilər paket şəklindədirsə, həmin paketin içinə də kağız dəsmal yerləşdirə bilərsiniz. Bu, nəmlik yığılmasının qarşısını alacaq və salat yarpaqlarını daha uzun müddət təzə saxlayacaq.

Bu necə işləyir?

Tərəvəz, meyvə və göyərti saxlanarkən nəmlik ifraz edir. Əgər bu nəmlik yığılarsa, kif əmələ gəlir və məhsul çürüməyə başlayır. Kağız dəsmallar isə artıq nəmi özünə çəkərək bu prosesi ləngidir və məhsulların xarab olmasının qarşısını alır. Üstəlik, kağız dəsmalları alma, armud və giləmeyvə kimi meyvələrin saxlanmasında da istifadə etmək olar - sadəcə məhsulların üstünə dəsmal qoymaq kifayətdir ki, nəmi özünə çəksin. Bu sadə üsul həm məhsulların təravətini qoruyur, həm də israfın qarşısını alır.

Milli.Az