4 yaşlı uşaq 6 gün çaqqalların arasında qaldı

Keniyanın Makueni rayonundan olan dörd yaşlı uşaq Afrika səhrasında hiyena və çaqqalların arasında 6 gün olub və sağ qalıb.

Milli.Az bildirir ki, bu barədə Kenyans.co.ke məlumat yayıb.

Uşaq noyabrın 29-da qardaşları ilə mal-qara otararkən itib. 70 nəfərdən ibarət axtarış-xilasetmə qrupu onu axtarmağa başlayıb. Xilasedicilər uşağın hərəkətlərini izləməyə çalışsalar da, nəticə olmayıb. Onlara "David Sheldrick Trust" şirkəti kömək edib, itkin düşən uşağı havadan axtarmağa başlayıb.

Güclü yağışlar başlayıb və oğlanın izlərini tapmaq demək olar ki, mümkünsüz olub. "Dörd saatlıq axtarışdan sonra boş yanacaq çənindən başqa heç nə tapmadıq və hiyena və çaqqaldan başqa heç nə görmədik. Belə bir mühit tək başına ola biləcək hər hansı bir insan üçün təhlükəlidir. Kiçik bir uşaq üçün isə çox təhlükəlidir. Güclü yağışlar səbəbindən yerüstü su qıtlığı yaranmayıb. Bu, heç olmasa, uşağın susuzluqdan ölməyəcəyinə əminlik verdi", - deyə "David Sheldrick Trust" pilotu Roan Karr-Hartli jurnalistlərə bildirib.

Axtarışların altıncı günündə xilasedicilər itkin düşən oğlanın izlərini tapıblar. Karr-Hartli cəld təyyarəyə minib və ona göstərilən koordinatlarda havaya qalxıb. Bir müddət sonra kolların arasında gizlənən uşağın diqqətini çəkib. "Gözlərimə inanmadım, amma o, orada idi: sonsuz səhra ilə əhatə olunmuş kiçik bir oğlan. Onun hələ də sağ olması və yeriməsi məni şoka saldı", - pilot deyib. Kişi uşağı gözdən itirməmək və axtarış qrupunun onu tapmasına kömək etmək üçün 30 dəqiqəyə yaxın uşağı tapdığı yerdə dövrə vurmağa məcbur olub. Nəhayət, xilasedicilər oğlanın yanına gedərək ona ilkin tibbi yardım göstəriblər.

Uşağın bədənini tikanlı kollar cızıb və ağcaqanadlar dişləyib. Həmçinin, ayaqları çox yeriməkdən xəsarət alıb. Uşaq xəstəxanaya aparılıb və bu günə kimi orada qalıb. O, ciddi xəsarət almayıb.

İrfan Vəliyev
Milli.Az