Bakıdan İstanbula gedən evin tək oğlu yoxa çıxdı: "Ana, məni daha axtarma" - FOTO

Türkiyənin İstanbul şəhərinə gedən Azərbaycan vətəndaşı itkin düşüb.
 
Milli.Az xəbər verir ki, bu haqda azxeber.com-a yoxa çıxan Şükürov İlkin Xanəsgər oğlunun anası Ülkər Şükürova məlumat verib.
 
Ananın dediyinə görə, oğlundan 3 həftədir ki, xəbər ala bilmir: "İlkin mart ayının 4-də Bakıdan Toros Turizm şirkətinə aid avtobusla İstanbula gəlib. O, 1990-cı ilə Rusiyada dünyaya göz açıb və Azərbaycan vətəndaşıdır. Özəl xəstəxalanalardan birində kuryer olaraq işləyirdi".
 
Ülkər Şükürova deyir ki, oğlunun yoxa çıxmasında qaranlıq məqamlar var: "Həmişə deyirdi Türkiyədə yaşamaq istəyirəm, ən böyük arzum İstanbulu görməkdir. Ötən il İstanbula gəzməyə gedəcəkdik, amma alınmadı. 6 aydır çox dəyişmişdi. Özünə qapanırdı, gizli-gizli telefonla danışırdı. Şübhələnirdim. Başqa birinə çevrilmişdi. Baxışları belə dəyişmişdi. Evdən getmədən bir neçə gün öncə dedim ki, oğlum birdən gedərsən bir yerə, səni aldadıb apararlar. Elə bir ürəyimə dammışdı. Dedi "yox, mama, mən səni buraxıb heç bir yerə getmərəm". İnanmazdım ki, oğlum məni atıb gedər. Ayın 3-də evdən çıxıb, 4-də xəbər tutduq ki, pasportu ilə Türkiyəyə gelib. Özü ilə heç nə götürməyib. Avtobusda bilet alanda deyib ki, Laləliyə gəzməyə gedirəm. Telefonu da o gündən bağlıdır.
 
Ana deyir ki, televiziyada süjet efirə gedəndən sonra ona naməlum nömrədən mesaj gəlib: ""Space" Televizyasının Türkiyə təmsilçiliyi məndən sujet hazırladı verdi, o gecə bizə bir nömrədən mesaj gəldi ki, mən Şam şəhərindəyəm. Bir daha məni axtarmayın. Nə qədər zəng edirik telefonu açan yoxdu. Türk polisinə müraciət etmişəm, onlar da axtarır. Ancaq deyirlər ki, onun yaxınındakı adamlar tapılmalıdır ki, hara getdiyini öyrənə bilsinlər. Oğlum kiminlə oturub dururdu bilmirəm. 15 gündür İstanbuldayam. Səsimi hər kəs eşitsin istəyirəm. Oğlumu tanıyanlar, bilənlər mənə kömək etsinlər. Çarəsizəm. Gözümün ağı-qarası bir oğlum var. Mən onsuz yaşaya bilmərəm. Bilirəm oğlumu Türkiyəyə aldadıb, gətiriblər. O heç vaxt məndən ayrılmazdı. Xahiş edirəm bir gözüyaşlı ananın səsini eşidin, mənə kömək edin". 
 
Qeyd edək ki, məsələylə bağlı Azərbaycanın İstanbuldakı konsulluğuna da məlumat verilib, onlar da İlkini axtarır. 
 
Ana övladının fotolarını da təqdim edib.

Milli.Az

Digər maraqlı xəbərlər Milli.Az-ın Facebook səhifəsində