Bu məşq yuxuya getməyinizə kömək edəcək

Yaponiyada tətbiq olunan və ilk baxışdan qəribə görünən bir məşqin yuxuya daha tez getməyə kömək edə biləcəyi bildirilir. Mütəxəssislərin sözlərinə görə, tarakan metodu kimi tanınan bu üsulun arxasında elmi əsaslandırma dayanır.

Milli.Az lent.az-a istinadən bildirir ki, məşq zamanı insan arxası üstə uzanır, əllərini və ayaqlarını yuxarı qaldıraraq təxminən 30 saniyə ərzində yüngül şəkildə hərəkət etdirir.

Hərəkət çevrilmiş tarakanın tərpənişinə bənzədiyi üçün bu üsul qeyri-rəsmi olaraq tarakan metodu adlandırılır. Mütəxəssislər izah edirlər ki, axşam saatlarında orqanizm yuxuya hazırlaşarkən bədən temperaturu təbii şəkildə aşağı düşməyə başlayır. Bu səbəbdən də yuxu otağında temperaturun 19 dərəcədən yuxarı olmaması tövsiyə edilir.

Yuxudan əvvəl qan dövranı xüsusilə əl və ayaqlarda güclənir. Bu nahiyələr artıq istiliyin bədəndən xaric olunmasına kömək edir. Qan dövranı nə qədər yaxşı olarsa, orqanizm bir o qədər tez soyuyur və yuxu prosesini başladan bioloji mexanizmlər daha sürətlə işə düşür.

Araşdırmalar hələ 1990-cı illərin sonlarında göstərib ki, insanın nə qədər tez yuxuya getməsini müəyyən edən əsas göstəricilərdən biri ayaqların temperaturudur. Ətrafların daha isti olması bədənin soyumasını sürətləndirir və bu da yuxuya getmə müddətini azalda bilər.

Məhz bu prinsipə əsaslanan yapon məşqində əllərin və ayaqların yüngül şəkildə silkələnməsi qan dövranını aktivləşdirir, istiliyin bədəndən xaric olmasını asanlaşdırır və əzələlərin rahatlamasına kömək edir. Məşqi yatmazdan dərhal əvvəl təxminən 30 saniyə ərzində etmək tövsiyə olunur.

Bu texnika ötən əsrin birinci yarısında yapon mühəndisi və aikido müəllimi Katsuzo Nişi tərəfindən hazırlanan "Nişi Sağlamlıq Sistemi"nin elementlərindən biridir. Sistemin bütün müddəaları elmi baxımdan tam təsdiqlənməsə də, qan dövranının yaxşılaşdırılması və bədənin təbii soyumasının dəstəklənməsi prinsipi müasir somnologiya elmi ilə uyğunluq təşkil edir.

Mütəxəssislər qeyd edirlər ki, eyni məntiq digər axşam vərdişlərinə də aiddir. Məsələn, yatmazdan əvvəl isti corab geyinmək və ya isti vanna qəbul etmək qan damarlarının genişlənməsinə səbəb olur. Nəticədə bədən daha sonra istiliyi daha asan itirir və yuxuya getmək asanlaşır.

Müəllif: Tural Hüseyn (Milli.Az redaktor)