Çörəyi klokun içinə qoymazdan əvvəl bir daha düşünün

Süfrələrin əvəzolunmazı olan çörəyi təzə saxlamaq üçün ən çox müraciət edilən üsul - yəni onu plastik torbaya qoymaq - əslində ən böyük səhvlərdən biridir. Praktik görünsə də, bu üsul çörəyin həm toxumasını, həm də dad keyfiyyətini ciddi şəkildə pisləşdirir.

Milli.Az çörəyi plastik torbada saxlamağın zərərləri və doğru saxlama yollarını təqdim edir:

Plastik torba nəmin tələsidir
Plastik torbalar hava axınını tamamilə kəsir. Bu isə çörəyin içindəki nəmin kənara çıxa bilməməsinə səbəb olur.

Çörəyin içi rütubətli qalır, lakin o məşhur xırtıldayan qabığı yumşalaraq süngərvari bir hala düşür. Xüsusilə isti çörəyi torbaya qoymaq onun dərhal "tərləməsinə" və xüsusiyyətini itirməsinə səbəb olur.

Xırtıltı yox olur, bayatlama hissi artır
Çörəyin qabığını xırtıldadan onun quruluğudur. Plastik torba çörəyi "tərlətdiyi" üçün qabıq elastikliyini itirir. Bu da çörəyin təzə olsa belə, ağızda bayat dadı verməsinə gətirib çıxarır.

Əgər çörəyin qabığının formasını qorumaq istəyirsinizsə, hava axınına icazə verən üsullardan istifadə etməlisiniz:

Kağız paketlər: Artıq nəmi özünə çəkir və çörəyin "nəfəs almasını" təmin edir.

Parça (kətan) torbalar: Çörəyin qurumasının qarşısını aldığı kimi, həddindən artıq nəmlənməyə də imkan vermir.

Çörək qabları: Sərin və quru yerlər hər zaman plastik torbalardan daha sağlamdır.

Dondurucu istisnadır
Gündəlik istifadə üçün plastik torba zərərli olsa da, çörəyi uzunmüddətli saxlamaq üçün dondurucuya qoyduqda plastik torbadan istifadə edilə bilər. Çünki dondurucuda əsas məqsəd çörəyin nəmini qorumaq yox, onun quruyub daşlaşmasının qarşısını almaqdır.

Çörəyin təzə qalması üçün ən yaxşı üsul onu kəsilmiş hissəsi taxtanın üzərinə baxacaq şəkildə otaq temperaturunda saxlamaqdır. Beləcə, kəsilmiş hissə hava ilə təmas etmir, qabığı isə nəfəs almağa davam edir.

Lalə Qüdrətova
Milli.Az