Yeməyi bu formada bişirəndə kanserogen maddə yaranır - Diqqət!

Sobanın içində yaranan qurumuş yağ qatı və his yalnız estetik problem deyil, həm də sağlamlıq üçün risk yaradır.

Milli.Az xəbər verir ki, bunu açıqlamasında Rusiya Texnoloji Universitetinin (RTU MIREA) biotexnologiya və sənaye farmasiyası kafedrasının dosenti, farmasevtika elmləri namizədi Mariya Zolotaryova bildirib.

Onun sözlərinə görə sobanın divarlarında yaranan naqar və his bişirmə zamanı sıçrayan yağ və ətin şirəsindən əmələ gəlir. Bu maddələr yüksək temperaturda parçalanaraq mürəkkəb kimyəvi reaksiyalara girir və nəticədə çətin təmizlənən qat əmələ gətirir.

"Bu qat qalınlaşdıqca sobanın istiliyi bərabər paylanmır, yemək tam bişməyə bilər və bu da mikroorqanizmlərin qalmasına, nəticədə qida zəhərlənməsinə səbəb ola bilər", - deyə ekspert izah edib.

Zolotaryova əlavə edib ki, naqar mikroblar üçün əlverişli mühit yaradır. Bişirmə zamanı istilik onların çoxunu məhv etsə də, sobadan çıxarılan yeməklə təmas zamanı yenidən qidaya keçə bilərlər.

Bundan başqa, sobada yanan yağ və qida qalıqları nəticəsində akrilamid, heterosiklik aminlər və polisiklik aromatik karbohidrogenlər kimi maddələr yaranır. Bu birləşmələr heyvanlar üzərində aparılan tədqiqatlarda bəzi xərçəng növləri ilə əlaqələndirilib və şərti kanserogenlər hesab olunur. Mütəxəssis qeyd edib ki, nadir hallarda belə qida qəbul etmək ciddi təhlükə yaratmasa da, davamlı şəkildə belə yemək yemək tövsiyə olunmur.

Bundan əlavə, yanmış yağdan əmələ gələn akrolein maddəsi nəfəs yollarını qıcıqlandıra bilər. "Akrolein buxarlarını udmaq göz, burun və boğazın selikli qişasında yanma hissi yaradır. Xüsusilə astması və allergiyası olan insanlarda bu, vəziyyətin pisləşməsinə səbəb ola bilər," - deyə Zolotaryova xəbərdarlıq edib.

Mütəxəssis sobanın müntəzəm və diqqətli təmizlənməsini zəruri adlandırıb. Bişirmədən sonra sobanı təmizləmək daha asan olur və bu, zərərli birləşmələrin yığılmasının qarşısını alır. "Təmizlik üçün xlorlu və çox güclü qələvi vasitələrdən istifadə etmək məsləhət deyil, çünki onlar nəfəs yollarını qıcıqlandıra bilər və qalıqları qidaya keçə bilər. Sobanı yuduqdan sonra səthləri təmiz su ilə yaxalamaq və cihazı havalandırmaq lazımdır," - deyə ekspert əlavə edib.

İsmayıl
Milli.Az