20–30 yaş arası şəxslərdə ürək xəstəliyinin 5 əsas əlaməti

Bir vaxtlar yalnız yaşlılarda rast gəlinən ürək xəstəlikləri, artıq 20-30 yaş arası gənclər üçün də ciddi təhlükəyə çevrilib. Dünya Səhiyyə Təşkilatının (DST) məlumatlarına görə, ürək-damar xəstəlikləri dünyada ölümün əsas səbəbi olaraq qalır. Həkimlər bildirirlər ki, xəstəliyin ilkin əlamətlərinin vaxtında müəyyən edilməsi həm təcili tibbi müdaxilə, həm də həyat tərzinin dəyişdirilməsi sayəsində xəstəliyin qarşısını ala bilər.

Gənclərdə ürək xəstəliyi riskini artıran amillər

Qeyri-sağlam qidalanma

Hərəkətsiz həyat tərzi

Siqaret istifadəsi

Yüksək stres

Bütün bunlara baxmayaraq, bədən çox vaxt yaxınlaşan problemlər barədə xəbərdarlıq siqnalları verir.

Sinə ağrısı

Gənc insanlarda ürək problemlərinin ən əsas əlaməti sinə ağrısıdır. Bu ağrı çox vaxt "sinədə fil otururmuş kimi" sıxıcı, təzyiqedici və ya yandırıcı formada hiss olunur. Ağrı boyun, çənə, çiyin, sol qol, bel və ya mədəyə yayıla bilər. Əgər bu ağrı təkrar-təkrar baş verirsə və ya bir neçə dəqiqədən çox davam edirsə, dərhal həkimə müraciət etmək lazımdır. Bu simptomları görməməzlikdən gəlmək infarkt və digər ciddi nəticələrə səbəb ola bilər.

 Xroniki yorğunluq

Yaxşı yatdıqdan sonra belə özünüzü tamamilə yorğun hiss edirsinizsə, bu da ürək problemlərinin əlaməti ola bilər. Gəzinti və ya pilləkən qalxmaq kimi sadə fəaliyyətlər zamanı yaranan səbəbsiz yorğunluq və nəfəs darlığı ürəyin bədənin ehtiyac duyduğu qədər qan pompalaya bilməməsindən qaynaqlanır. Bu hal davamlı olarsa, tibbi müayinə vacibdir.

Anormal ürək döyüntüsü

Bəzi gənclər döyüntülərini "ürəyin düşməsi" və ya "çırpınma" kimi təsvir edir. Vaxtaşırı döyüntü pozuntuları problem yaratmaya bilər, amma başgicəllənmə və sinə ağrısı ilə müşayiət olunan sürətli döyüntü aritmiya və ya başqa ürək xəstəliklərinin xəbərçisi ola bilər. Bu halda kardioloqa müraciət etmək vacibdir.

Başgicəllənmə və ya huşun itməsi

Ürək ritm pozuntuları və ya struktur problemlər beyin qan dövranını azalda bilər, bu da qəfil başgicəllənmə və bayılmalara səbəb olur. Bu hallar ciddi sağlamlıq probleminə işarə edə bilər və təxirəsalınmaz tibbi yardım tələb edir. Səbəblər arasında aritmiya və aşağı qan təzyiqi ola bilər.

Bədəndə şişkinlik

Ürək çatışmazlığı zamanı ürək bədənə qanı lazımi şəkildə pompalaya bilmir, nəticədə ayaqlarda, topuqlarda və bədəndə şişkinlik yaranır. Bu dəyişiklik əvvəlcə dar ayaqqabılar və ya üzük sıxması ilə hiss edilə bilər. Şişkinlik, yorğunluq və nəfəs darlığı ilə müşahidə olunursa, bu, ürəklə bağlı ciddi problemin göstəricisidir.

Lalə Qüdrətova
Milli.Az