Sağlamlıq

Gözəllik salonunda saç yudurtmağın gizli sağlamlıq riski var imiş

21 Yanvar 2025 06:06

Baxış: 462

#SAĞLAMLIQ

Gözəllik salonlarında və bərbərlərdə saç yumağın sağlamlıq risklərinə səbəb ola biləcəyi açıqlanıb.

Milli.Az e-saglam.az-a istinadən xəbər verir ki, Westminster Universitetindən nevroloq Maria Aşioti, "gözəllik salonu insult sindromu" (BPSS) adlandırılan bu vəziyyətin, başın və boyunun əl-üz yuyanın sərt kənarına səhv bucaq ilə uzanması nəticəsində meydana gəldiyini bildirib. Bu vəziyyət boyun fəqərələrindəki damarların sıxılmasına və beyinə qan axınının azalmasına səbəb ola bilər. Nəticədə nadir hallarda da olsa, beyin insultu ilə əlaqəli simptomlar inkişaf edə bilər.

BPSS halları az təsadüf edilir, 2016-cı ildə İsveçrədə aparılan bir araşdırma 2002-2013-cü illər arasında yalnız 10 belə hadisə qeydə alıb. Simptomlara baş ağrısı, başgicəllənmə, bulanıq görmə, ürəkbulanma, boyun ağrısı və bədənin bir tərəfində iflic daxildir.

Aşioti, bu vəziyyətdən narahat olanlara saçlarını yuyarkən başını önə doğru əyərək yumağı, yuma zamanı narahatlıq hiss etdikdə salondakı ustalarına məlumat verməyi tövsiyə edir. Uzun müddət uzanmaqdan çəkinmək və zərif yuma tələbi də riskləri azaltmağa kömək edə bilər. Bu ehtiyat tədbirləri ilə potensial sağlamlıq problemlərinin qarşısını almaq mümkündür.

Milli.Az